Хятадын сошиал Weibo-гийн хэрэглэгчид “Цагтай ах хүү” хэмээн нэгэн албан тушаалтныг нэрлэж, андахгүй сайн таних болжээ.
Ян Да Цай хэмээх тэр хүн үнэтэй бугуйн цагаа ямар мөнгөөр худалдан авснаа тайлбарлаж, орлогоо нотолж чадаагүй тул 14 жилийн ял авсан байна. Хэрэг юунаас эхэлснийг эхнээс нь дурдая.
Ян Да Цай бол Шаньси мужийн Аюулгүй байдлыг хамгаалах товчооны дарга юм байна. Гэхдээ үнэтэй тансаг цаганд их дуртай нэгэн гэнэ. Мужид нь маш том осол болж, 36 хүн амь эрсэдсэн газар явж оччихоод хэргийн газар инээмсэглэн зогсоо зураг нь weibo-гоор таржээ. Энэ зургийг харсан олон хүн дургүйцлээ илэрхийлж эхэлсэн байна. Олон ч мем зураг тарж эхэлжээ.
Ян Да Цай яагаад инээмсэглэснээ тайлбарлахдаа “Аймшигтай осол харж айж цочирдсон хүмүүсийг тайвшруулах гэхдээ л инээмсэглэсэн юм” гэжээ. Гэвч олон нийт энэ үгэнд нь итгэсэнгүй, хууртсангүй. Инээд алдан зогсоо том гүзээтэй хурган дарга улам их шүүмжлүүлж, үзэн ядуулахад хүрчээ.
Тэгж байтал нэгэн интернэт хэрэглэгч түүний бугуйндаа зүүсэн цагийг Vacheron Constatin Fiftysix буюу 65 мянган ам.долларын үнэтэйг гаргаж тавьжээ. Ийм өндөр үнэтэй цагийг жирийн төрийн албан хаагч цалингаараа авах ямар ч боломжгүй гэж олон нийт улам бухимдав. Тэгтэл Bulgari, Omega, Rolex гээд өндөр үнэтэй цагийг ээлжлэн зүүдгийг зургуудаас нь олж, гарган тавих нь тэр.
Ян Да Цай өөрийгөө дахин хамгаалж, “Хууль ёсоор авсан цалингаараа авсан. Энэ талаараа Коммунист намдаа ч мэдэгдэж байсан” гэжээ. Гэвч Хятадын төр засаг олон нийтийн дургүйцлийг гойд төрүүлсэн түүнийг эхлээд “Сахилга бат ноцтой зөрчсөн” гэсэн үндэслэлээр халаад, дараа нь авлига авсан хэмээн 14 жилийн ял оноосон байна.
Сүүлийн жилүүдэд Хятадын олон нийт өндөр албан тушаалтнуудын өмссөн зүүсний үнэтэй тансагийг хянаж, шүүмжлэх нь ихэссэн. Цалингаараа авч чадахгүй гэж бичих нь элбэгшсэн байна. Тиймээс Хятадын төр засгаас хэтийдсэн өндөр үнэтэй, стандартыг давсан зүйлс хэрэглэхийг хориглох болсон байна.
Сэтгэгдэл (0)
Сэтгэгдэл бичигдээгүй байна