Жил гаруй найзалж, хамтдаа хуримдаа бэлдэж сүйд болсон бүсгүйтэйгээ ойртох нь ёс суртахуунд нийцэхгүй хэмээн боловсон зан гаргаснаас индонез эр ийм байдалд оржээ.
Вангунжаи хэмээх тосгоны 26 настай залуу Чианжур эелдэг, танхил бүсгүй Адинда Канзүд дурлажээ. Танилууд нь Адиндагийн дуу хоолой сонсмогцоо л “Ямар нинжин гоё хоолойтой юм бэ!” гэж уулга алддаг байж. Тэр үргэлж урт даашинзтай явдаг гэнэ. Нүүр амаа бол байнга будаастай. Яахав, эмэгтэй хүний л зан хойно. Тэгээд ч Адинда бүтэн өнчин болохоор тусалж дэмжих хэрэгтэй гээд Чианжурын сэтгэл бүр уярсан байна.
Өнчин бүсгүйг шахамдуулж өвөртөө оруулаад яахав гэж боловсон зан гарган, хуримаа өнгөртөл тэсвэртэйеэ хүлээжээ. Залуугийн эцэг эх нь “Энэ бүсгүйд ядаж нэг хамаатан садан баймаар юм” гэж их хайна. Тэгж явсаар Адиндагийн аавыг олсон байна. Аавыг нь яг олох тэр үед хуримаа хийгээд 14 хоносон эрийн тэсвэр тэвчээр алдарч эхлэхэд Адинда өөрийгөө эрэгтэй хүн гэдгийг хэлжээ. Учир шалтгаанаа тайлбарлахдаа “Надад мөнгө их хэрэгтэй байсан юм аа” гэсэн байна.
Олдсон аав нь ч охингүй харин хүүтэй гэдгээ хэлжээ. Ингээд хуурамч эхнэрийг хуулийн дагуу дөрвөн жилийн хугацаатай шоронд хорих шийдвэр гарчээ.
Сэтгэгдэл (0)
Сэтгэгдэл бичигдээгүй байна