ДЭЛХИЙН ХАМГИЙН ХЯМД ЗОЧИД БУУДЛЫГ СОНИРХОЦГООЁ!

Hilton, Marriott зэрэг Дэлхийн алдартай, тансаг зочид буудлуудын гантиг шатаар өгсөж үзсэн, эсвэл дэлгэцээр харсан хүмүүс бишгүй л бий байх.

Харин Дэлхийн хамгийн хямд зочид буудлыг харсан үзсэн хүн Монголд бараг үгүй болов уу гэж яагаад ч юм бодно. Тэгвэл тэрхүү зочид буудал Бангладешийн Дакка хотод байрладаг гэнэ. Нэр нь Faridpur Hotel.

Ер нь энэ буудлын дэргэд очлоо ч та хоночихож болохоор газар юм гэж бодохгүй л болов уу. Хуучны жижигхэн таван усан онгоцыг бөөрөөр нь нийлүүлээд тавьчихсан энэ зочид буудал эхний үйлчлүүлэгчээ 1951 онд авчээ. Жижиглэнгийн наймаачид хотын зах дээр ирэхдээ энд амардаг. Нэг талаас нь бодвол бидний Эрээнд очоод буучихдаг хямдхан зочид буудалтай төстэй ч юм шиг.

Энэ “гайхамшигтай” зочид буудлын нэг хоногийн төлбөр нь 1.5 ам.доллар. Өнөөдрийн ам.долларын ханшаар бодвол 5065 төгрөг болж байна. Хямд байгаа биз? Хямддаа бас учир байна аа. Үүнээс хямд өрөө бас бий гэнэ. Тэр нь бүр 0.39 ам.долларынх. Хоног нь шүү. Гэхдээ 18 хүний нийтийн буудал гэх юмуу даа. 18 хүн зэрэг зулаад унтчихна л гэсэн үг. 00 нь хонгилынхоо төгсгөлд. Хүйтэн устай, үнэт эдлэлээ хийх төмөр хайрцагтай гэж байгаа. Хувцасны шүүгээний оронд олс татчихсан. Хананд юм өлгөе гэвэл хадаас шаачихсан байх жишээтэй.

Энд нийтдээ 48 өрөө бий. Бүхнийг хэмнэх гэж явдаг хүмүүст яг тохирсон газар. Ерөнхийдөө хөдөө нутгаас ирсэн наймаачид энд буудаллаад буцдаг аж. Их хямдхан болохоор нь олон хоногоор авчихдаг хүмүүс ч бас байдаг сурагтай.

Бас зочид буудал хойно хориглох зүйлс гэж бий. Архи согтууруулах ундааны төрлийн зүйл хэрэглэж болохгүй, хөгжмөө чанга тавихгүй мөн гэр бүлээрээ амьдрахгүй. Тийм ээ, эхнэр хүүхэдтэйгээ тэнд хоноё гэвэл “Үгүй” л гэнэ.

Сүүлийн 26 жилийн турш энэ зочид буудлыг эрхэм Мухаммад Миан эзэмшиж байгаа ажээ. Бизнесээ өсч хөгжиж байна гэсэн өөдрөг бодолтой эр. Гаднаас нь харахад зочид буудал нь хөгжсөн, гялтайсан зүйл огт үгүй ч гэлээ хоосон хонодог өрөө байдаггүйг л мань хүн хэлж буй хэрэг.