ТАЙЛАНД ЗАЛУУ ЦЭРГИЙН АЛБАНЫ СУГАЛААНД ОРОЛЦОХООС ТАТГАЛЗАЖ БУЙГАА ЗАРЛАЛАА

Тайланд улсад дөрөвдүгээр сар бүр залуус цэргийн алба хаах сугалаанд оролцдог байна. Хэрвээ улаан хуудас татвал хоёр жилийн цэргийн алба хаана. Харин хар хуудас татвал цэргийн албанаас чөлөөлөгддөг ажээ.

Тэгвэл 27 настай Нетивит Чотипхайтфайсал хэмээх залуу өнгийн хуудас сөхөж, цэргийн алба хаах журмыг хуучирсан, ялзарсан арга хэмээн үзэж татгалзсан байна. Түүнийг үүнийх нь төлөө гурван жил хүртэл хугацаагаар хорьж  ч магадгүй болжээ.

“Би түгшиж байна. Шоронд аваачаад хийчихвий гэж айхдаа сайн унтаж амарч чадахгүй юм. Хэрвээ тэгвэл би олон зүйлээ алдана. Би чинь хувьдаа жижиг ч гэсэн бизнестэй хүн. Гэхдээ хэн нэгэн энэ тогтолцоо, журмын эсрэг тэмцэх ёстой гэж би үзэж байгаа” хэмээн Нетивит мэдэгджээ.

Түүний үзэж буйгаар бол цэргийн албанд ихэвчлэн ядуу айлын хөвгүүдийг явуулдаг. Мөн хээл хахууль өгч цэргийн албанд явахгүй байх тохиолдол олон гэнэ. Оюутан цэрэг гэх хөтөлбөр байдаг ч гэлээ тэр нь ихэвчлэн хувийн сургуулийн хүүхдүүд буюу баян айлын хүүхдүүдийг л авдаг ажээ.

2014 онд цэргийн томоохон албан тушаалтнууд Тайландад төрийн эргэлт хийж, зургаан жилийн турш улсыг удирдсан. Харин 2020 оны сонгуулиар ялагдал хүлээсэн тул буусан юм. Хэдийгээр саяхан болсон сонгуульд Урагшаа хөдөлгөөнийнхөн ялалт байгуулсан ч гэлээ сенатуудын танхимаас тэдний ялалтыг хүлээн зөвшөөрөхөөс татгалзаж, улмаар Төр засгаа удирдахын тулд сөрөг хүчинтэй хамтрах ёстой болоод байгаа.

Нетивитийн бодож буйгаар бол цэргийнхэн төрийн эргэлт хийсэн нь цэрэг армид олон залуусыг сугалаагаар гэх нэртэйгээр хүчээр татаж, хүчийг нь зузаатгадагтай холбоотой аж. Мөн Тайландад хугацаат цэргийн алба хааж буй залуус амиа хорлох явдал байсхийгээд гардаг ч энэ талаар тодорхой мэдээлэл хийдэггүй байна. Мөн шашины тодорхой зэрэгт хүрсэн ламхай нарыг цэрэгт татдаггүй учир залуус лам болох хандлага ч гаарчээ.

“Өмнө нь хүмүүс ингэж үгээ хэлж зүрхэлдэггүй байлаа. Гэхдээ одоо байдал өөр болсон. 2020 онд залуучууд олноор оролцсон жагсаал цуглаан өрнөсөн. Тэр жагсаалаар зөвхөн цэрэгт алба хаах журмыг өөрчлөхийг шаардсанаас гадна улс оронд болохгүй байгаа олон асуудлыг сөхөж тавьсан” хэмээн Нетивит өгүүлжээ.