"Powerball" лотерейд өөрийгөө хожсон гэж зарласан АНУ-ын Орегон мужийн иргэнд шагналын 1.3 тэрбум ам.долларыг одоогоор өгөөгүй байгаа талаар "People" сэтгүүлд мэдээлсэн байна.
Лотерейн албаны хүмүүс тоглогч энэ дөрөвдүгээр сарын 6-нд асар их хэмжээний жакпот хожиж тэдэнд хандсаныг баталсан ч одоохондоо мөнгийг өгөхгүй гэжээ. Одоогийн байдлаар тухайн хүнтэй хамтран ажиллаж байгаа бөгөөд энэ нь аюулгүй байдлын арга хэмжээ, баталгаажуулалтыг багтаадаг үйл явц, нэлээд хугацаа шаардах болно гэсэн байна.
"Энэ бол Орегоны лотерейн хувьд урьд байгаагүй их хэмжээний жакпотын ялалт юм. Бид шагналын мөнгө олгохоосоо өмнө ялагчийг тодорхойлохын тулд урьдчилан сэргийлэх бүхий л арга хэмжээ авч байна. Энэ нь цаг хугацаа шаардах болно" гэж Орегон Лотерейн захирал Майк Уэллс хэлснийг хэвлэлд эш татжээ.
Тэрбумтан болсон хүний талаар өөр мэдээлэл одоогоор үгүй байгаа юм. Сэтгүүлд мэдээлснээр, хожлын тасалбарыг худалдан авсан Plaid Pantry дэлгүүр 100 мянган ам.долларын бонус авах учиртай гэнэ.
"Powerball"-ын сугалааны вэбсайтын мэдээлснээр энгийн хожих магадлал 24.87-д нэг байдаг бол жакпот хожих магадлал 292.1 саяд нэг байдаг ажээ.
Албаны хүмүүсийн хэлснээр Орегон хотод хожсон энэхүү жакпот нь Powerball-ын хувьд дөрөв дэх, АНУ-ын сугалааны жакпотуудын дунд найм дахь том нь хонжвор гэнэ.
Түүхэн дэх хамгийн том жакпот хонжвор гэвэл АНУ-ын Калифорнийн оршин суугч Эдвин Кастро 2022 оны арваннэгдүгээр сард "Powerball"-аас 2.04 тэрбум ам.доллар хожсон байдаг.
Энэ оны хоёрдугаар сарын 29-нд АНУ-д нэгэн эмэгтэй төрсөн өдрөөрөө сугалааны тасалбар худалдан авч, 1 сая ам.доллар хожсон байна. Иллинойсын оршин суугч тэрбээр шатахуун түгээх станцад өөрийнх нь дуртай ягаан өнгөтэй байсан учир сугалаат тасалбар худалдан авсан гэжээ. Эмэгтэй хонжворын мөнгөө хүүхдүүддээ зарцуулахаар төлөвлөж буйгаа ярьсан байна.
Сэтгэгдэл (0)
Сэтгэгдэл бичигдээгүй байна