500 жилийн дараа Японы бүх иргэдийн овог нь Сато болж магадгүй гэнэ. “Бүгдээрээ адилхан овогтой болчихоор хувь хүний ондоошил, ялгарал бүдгэрч, таагүй тавгүй сэтгэгдэл төрөх болно” хэмээн Тохокүгийн Их сургуулийн эдийн засгийн ухааны профессор, эрдэмтэн Хироши Ёшида мэдэгджээ.
Ийм байдалд хүргэхгүйн тулд 1800-гаад оны сүүлчээс эхлэн мөрдөж эхэлсэн гэр бүлийн тухай хуульд өөрчлөлт оруулах ёстой гэж Ёшида үзэж байна. Тухайн хуульд гэр бүлийн гишүүд нэг овогтой байх ёстой гэж заасан байдаг аж. Дэлхий дээр гэр бүлийн гишүүд нэг овогтой байх ёстой гэж хуульчлан хатуу заасан ганц улс Япон ажээ. Нөхөр, эхнэрийн аль ч талын овгийг авч болох ч гэлээ хэрэг дээрээ 95 хувь нь нөхрийнхөө овгийг дагадаг байна.
Харин Сато гэх овог нь Японд хамгийн түгээмэл юм. Нийт иргэдийнх нь 1.5 хувь Сато. Түүний дараагаар Сүзүки гэдэг овог бичигдэж байгаа юм.
Ёшида заавал Сатог онцолж хэлсний учир нь 2022-2023 оны хооронд Сато овогтой хүмүүсийн тоо хэд дахин нэмэгджээ. Хэрвээ энэ хэвээрээ хурдацтай нэмэгдвэл 2446 он гэхэд Япончуудын тэн хагас нь Сатонууд болох юм байна. Харин 2531 он гэхэд бүгд нэгмөсөн Сато болох ажээ.
Think Name Project-ийн захиалгаар хийсэн судалгааны дүнгээс харвал Японы 20-59 насны 1000 иргэн дунд явуулсан санал асуулгаар гэр бүлийн гишүүд нэг овогтой байх ёстой гэсэн хуулийг 39.3 хувь нь дэмжсэн хэвээр байна. Өөрөөр хэлбэл, япончууд сурсан заншил ёсоосоо татгалзах бас дургүй байгаа гэнэ.
Хироши Ёшида профессорын зөвлөж буйгаар бол гэр бүлийн гишүүд өөр өөрийн овогтойгоо байх эрхийг нээж өгөхгүй бол бүгдээрээ Сато болчихоор тэднийг ялгах гэж нэрийнх нь ард дугаар тавих ч шаардлага тулгарч магадгүй гэнэ. Япончууд эхлээд дан Сатонуудын улс болох тухай яриаг дөрөвдүгээр сарын 1-ний наргиа гээд инээлдээд өнгөрч. Гэвч Ёшида огт тоглоом наргиа биш гэдгийг анхааруулсаар байна.
Сэтгэгдэл (0)
Сэтгэгдэл бичигдээгүй байна