АБРАХАМ ЛИНКОЛЬНЫ ХҮҮГИЙНХЭЭ БАГШИД БИЧСЭН ЗАХИДАЛ

АНУ-ын Арван зургаа дахь Ерөнхийлөгч Абрахам Линкольн хүүгээ сургуульд оруулахдаа ангийн багшид нь дараах сэтгэл хөдөлгөм захидлыг илгээсэн гэдэг. 

Хүүгийн минь хичээл өнөөдөр эхэлж байна. Эхэндээ бүх юм түүнд шинэ, сонин содон санагдах тул та хүүд минь эелдэг хандахыг би гуйж байна. Сургууль түүний хувьд тив дэлхий алгасах аялал байх болно. Аялал бүхэнд дайн тулаан, зовлон эмгэнэл, уй гашуу байдаг. Энэ бүхнийг давж туулахын тулд итгэл үнэмшил, хайр хүндлэл, урам зоригтой байх хэрэгтэй.
Тиймээс, эрхэм багш та, хүүгийн минь гараас хөтлөн, сурч мэдэх бүхнийг нь зааж сургаж өгнө үү, зааж сургахдаа хянамгай хандаарай, гуйя. Дайсан дотроос ч нөхөр хамсаатан олддогийг хэлж өг. Хүү минь хүн бүр энгийн биш, хүн бүр шударга байдаггүй гэдгийг ойлгох ёстой шүү. Муу хүн дотроос ч баатар төрдөг, шударга бус улс төрчдөд ч тэр манлайлагч олддог болохыг ойлгуулаарай.
Хүч хөдөлмөрөөр олсон 10 цент газраас олсон 1 доллараас үнэ цэнэтэй гэдгийг хэлж өг. Сургуулийн орчинд хуурахаас илүү муу авах нь шударга болохыг ойлгуул. Түүнд хэрхэн ухамсартай ялагдахыг, ялалтандаа хэрхэн урамшихыг зааж өг.
Хүмүүстэй эелдэг харьцах, хатуу хүмүүстэй хатуу хандахыг хэлж өг. Түүнийг атаа хорслоос ангид байлгаж, даруухан инээмсэглэх нууцыг зааж өгөөрэй. Түүнд гунигласан үедээ ч хэрхэн инээмсэглэхийг, уйлахад ичих зүйл огт байхгүйг зааж өг. Бүтэлгүйтлээс ч амжилт эхэлж болох, ялалт ч гуниг цөхрөлд хүргэж болохыг хэлж өг. Гаднаасаа төгс сайхан харагдаж байгаа бүхэн үнэндээ тийм байдаггүйг ойлгуулаарай.
Түүнд эрдэм номын гайхамшгийг ойлгуул, гэхдээ түүнд толгодын энгэрт ургасан цэцэгс, наранд шимтэх зөгий, тэнгэрт нисэх шувуудын тухай тунгаан бодох цаг хугацаа өгөөрэй. Хэдий хүн болгон буруутгаж байсан ч өөрийн үзэл бодолдоо үнэнч байхыг зааж өг.
Хүүд минь нийтээрээ аялдан дагаж байсан ч тэднийг дагахгүй байх сэтгэлийн хүч чадлыг өгөхийг хичээгээрэй. Түүнд хүн бүхний үгийг сонсохыг зааж өг, гэхдээ үнэн зөв, эерэг болгоныг ялгаж салгаж сурахыг зааж өгөөрэй.
Авъяас чадвар, оюун ухаанаа хамгийн өндрөөр үнэлэхийг зааж сурга, харин зүрх сэтгэл, мөн чанараа юугаар ч үнэлж болохгүйг ойлгуул. Түүнд тэвчээр алдах эр зориг, ухаантай байх тэвчээрийг олго. Өөртөө гүн хүндэтгэлтэй итгэл үнэмшилтэй байхыг зааж сурга, ингэснээр тэр үргэлж бусдад болон бурханд итгэл үнэмшилтэй хандах болно.
Энэ бол тушаал шүү, чадахаараа хичээгээрэй. Тэр бол өхөөрдөм бяцхан хүү, үр минь юм шүү.