Дэлхийн дэвжээнд эх орныхоо нэрийг гурвантаа дуурсгаж, хоёр мөнгө, нэг хүрэл медаль хүртэн, Олимпын наадамд V байр эзэлсэн Монгол Улсын Гавьяат тамирчин Д.Отгонжаргал хэсэг хугацаанд их спортоосоо хөндийрөөд байсан билээ.
Харин түүний спортын замналын дараагийн хуудас энэ жилийн насанд хүрэгчдийн ДАШТ-д оролцох тамирчдыг сонгон шалгаруулах сорил тэмцээнээр дахин эхлэв.
Тэрээр 2024 оны Парисын Олимпын наадмын дараа эрүүл мэндийн шалтгаанаар хэсэг хугацаанд завсарлаж, дараа нь амьдралынхаа хамгийн нандин мөчүүдийн нэгийг угтан, бяцхан хөөрхөн гүнжээ өлгийдөн авч ээж болсон билээ. Энэ нь түүний амьдралд спортын амжилтаас өөр нэгэн том, нандин ертөнцийн үүдийг нээсэн аз жаргалтай үйл явдал байсан юм.
Д.Отгонжаргал эргэн ирж, өөрийн ур чадвар, тэсвэр хатуужил, сэтгэлийн хүчээ дахин харуулан, дэлхийн шилдгүүдтэй өрсөлдөх эрхийн төлөөх сорилд амжилттай оролцож, энэ жилийн насанд хүрэгчдийн ДАШТ-ийг зорих эрхээ өвөртлөн Казахстаны нийслэл Астана хотноо болох дэлхийн аваргын дэвжээнд дахин зодоглохоор боллоо.
Энэ бол зүгээр нэг ялалт биш. Энэ бол шилдэг тамирчин ямар ч завсарлагааны дараа өөрийнхөө байр суурийг эргэн баталж чаддагийн нотолгоо, эх хүн болсон ч их спортын оргил өөд тэмүүлэх хүсэл мөрөөдөл хэзээ ч төгсдөггүйг харуулсан гайхалтай эргэн ирэлт юм.
Д.Отгонжаргалдаа дэлхийн дэвжээнээ амжилт хүсье.
Сэтгэгдэл (0)
Сэтгэгдэл бичигдээгүй байна