Швейцарийн Женев хотноо НҮБ-ын Дүрвэгсдийн байгууллагын Зөвлөлийн ээлжит чуулганы үеэр Казахстаны дуучин, хүмүүнлэгийн зүтгэлтэн Димаш Кудайбергенийг өчигдөр /2025.12.08/ НҮБ-ын Сайн санааны элчээр томилжээ.
Димаш 2024 онд Бүс нутгийн сайн санааны элчээр томилогдсон юм. Тэрбээр цагаачдын асуудлыг олон нийтэд таниулах, тэдний нэгдмэл байдлыг дэмжих, хөрөнгө босгох ажилд оролцох зэргээр НҮБ-ын Дүрвэгсдийн байгууллагын үйл ажиллагааг дэмжсэн.
НҮБ-ын Ерөнхий нарийн бичгийн дарга Антонио Гутерриш 2024 онд Казахстанд айлчлах үеэр Димаш урлагаар дамжуулан хүмүүнлэгийн үйлс хийх талаарх төлөвлөгөөгөө танилцуулсан юм.
2025 онд Димаш НҮБ-ын Дүрвэгсдийн байгууллагатай хамтын ажиллагаагаа өргөжүүлж, хэд хэдэн чухал арга хэмжээг зохион байгуулсан. Тэрбээр Рамадан кампанит ажилд оролцож, дэлхий даяарх сая сая дагагчдадаа энэрэн нигүүлсэхүйн үзэл санаа, хүн худалдаалах асуудал болон эрсдэлд өртсөн хүмүүсийг хамгаалах хэрэгцээний талаарх ойлголтыг түгээсэн юм. Димаш мөн НҮБ-ын Дүрвэгсдийн байгууллагын захиралтай уулзаж, хямралд өртсөн хүмүүсийг дэмжих амлалтаа дахин нотолжээ.
Дэлхийг тойрон Нью-Йорк, Мехико, Барселон, Лондон, Берлин зэрэг олон хотын үзэгчдэд хүргэсэн аялан тоглолтынхоо үеэр Димаш олон нийтэд хүртээмжтэй, тогтвортой байдлын үзэл санааг сурталчилж, Дүрвэгсдийн байгууллагын хүмүүнлэгийн үйлсийг дэмжихийг хүмүүст уриалжээ. Эдгээр үзүүлбэрээрээ дамжуулан тэрбээр дэлхий даяарх 100 мянга гаруй хүнд хүрч, Дүрвэгсдийн байгууллагын нэр хүнд, олон нийтийн оролцоог өргөжүүлэхэд тусалсан юм.
2025 оны 12-р сарын 8-ны өдрийн Зөвлөлийн хурлын үеэр Димаш гишүүн орнуудын төлөөлөгчид болон НҮБ-ын Дүрвэгсдийн байгууллагын ажилтнууд, үзэгчдэд зориулан "S.O.S. of a Terrine in Detresse" дууг дуулжээ. НҮБ-ын Дүрвэгсдийн байгууллага түүний хүмүүнлэгийн үйлсийг үнэлж, дэлхийг тойрон аялан тоглох үеэрээ эрхэм зорилгыг нь дэмжиж, нүүлгэн шилжүүлсэн болон эмзэг бүлгийн иргэдтэй эв санааны нэгдэлтэй байх үзэл санааг байнга түгээсэнд нь талархаж байгаагаа илэрхийлэв.
"Димаш дуу хоолойгоо сонсогчдын зүрх сэтгэлд хүрэхийн тулд төдийгүй хямралд нэрвэгдсэн хүмүүст туслах, тэдний соёлын өвөрмөц байдлыг хүлээн зөвшөөрөх үзэл санааг түгээхэд зориулсан" гэж НҮБ-ын Дүрвэгсдийн байгууллагын захирал Эми Поп хэлжээ.
Димаш Кудайберген итгэл хүлээлгэн цугларсан хүмүүст талархал илэрхийлээд “НҮБ-ын Дүрвэгсдийн байгууллагатай хамтран ажиллах нь миний амьдрал, карьерын хамгийн утга учиртай хэсгүүдийн нэг байсан. Кампанит ажил, санаачилга, яриа зэргээр дамжуулан энэ байгууллага нүүлгэн шилжүүлэлт, тодорхойгүй, хүнд хэцүү байдал тулгарсан хүмүүст хэрхэн нөлөөлж байгааг харсан. Дэлхийн сайн санааны элч болсон нь үнэхээр нэр төрийн хэрэг. Би үүнийг маш даруухан, хариуцлагатай, ухамсартай байдлаар хүлээн авч байна.
Сайн санааны элчийн хувьд цагаачдын асуудлыг олон нийтэд таниулах, аюулгүй шилжилт хөдөлгөөний талаарх мэдлэг түгээхэд анхаарч, хүртээмжтэй, тогтвортой байдлыг үргэлжлүүлэн сурталчилна. Та бүхний хандив цуглуулах болон яаралтай тусламжийн арга хэмжээг үргэлжлүүлэн дэмжих болно" гэж хэлсэн байна.
Анжелина Жоли, Шакира, Дэвид Бекхэм, Лионель Месси нарын алдартнууд НҮБ-ын Сайн санааны элчээр ажилладаг билээ.
Сэтгэгдэл (0)
Сэтгэгдэл бичигдээгүй байна