ОХУ-д орон сууц, хувийн байшинд зарим амьтдыг байлгавал их хэмжээний торгууль ногдуулах журам үйлчилж эхэлсэн талаар ЕЮС-ийн тэргүүлэх хуульч Олег Черкасов “Прайм” агентлагт ярьжээ.
Амьтны хүрээлэн зэрэг тусгайлан тогтоосноос бусад газарт тэжээхийг хориглосон аюултай 121 амьтны жагсаалтыг энэ оны тавдугаар сард тус улсын Засгийн газар баталсан гэдгийг хуульч сануулсан байна.
Жагсаалтад хэвлээр явагчид, хоёр нутагтан, хөхтөн амьтад, шувууд, түүнчлэн зарим төрлийн загас зэрэг амьтны аймгийн төрөл бүрийн бүлгийн төлөөлөгчид багтжээ. Могой, бар, матраас эхлээд зарим төрлийн загас хүртэл нийт 121 амьтныг тэжээвэр амьтан болгож, зөвшөөрөлгүй байлгахыг хориглосон гэсэн үг.
Энэ хоригийг зөрчсөн тохиолдолд 30 мянган рубль хүртэл торгууль ногдуулах юм. Хэрэв уг амьтан бусдын эд хөрөнгөд хохирол учруулсан бол торгуулийн хэмжээ 200 мянган рубль хүртэл нэмэгдэнэ.
Гэрийн тэжээмэл амьтан, тахиа, гахай, ямаа гэх мэтийг орон сууцанд байлгахыг шууд хориглоогүй. Гэхдээ хэрэв тэдгээр амьтад хөршүүдийн эрхийг зөрчсөн нь шүүхээр нотлогдвол эзэмшигчид нь 15 мянган рубль хүртэл торгууль ногдуулах бөгөөд амьтдыг нь хурааж болно.
Өмнө нь хуульч Виноградов гэрт тэжээж буй амьтан нь хэт чимээ шуугиан гаргаж, хурц үнэртэй байвал торгууль ногдуулдаг гэж ярьж байсан билээ.
Төрийн Думын депутат Игорь Антропенко аюул учруулж болзошгүй нохойн үүлдрийг орон сууцны байшинд байлгахыг хориглохыг 2025 оны аравдугаар сарын 1-нд санал болгосон. Тэдгээр нь нийтийн эзэмшлийн газар, тэр дундаа орц, цахилгаан шат зэрэгт эрсдэл учруулж болзошгүйг тэрбээр онцолсон талаар хэвлэлүүд мэдээлж байсан юм.
Сэтгэгдэл (0)
Сэтгэгдэл бичигдээгүй байна