Эх орныхоо дөрвөн зүгийн хязгаарыг төв цэгтэй холбосон 5000 км замыг туулахаар 2025 оны 4 дүгээр сарын 02-ны өдөр Баян-Өлгий аймгийн Алтай таван богдын Сонгинотын даваанаас гараагаа эхлүүлсэн “Таван цэг” багийнхан 94 дэх өдрөө өмнөд цэгийг чиглэж гүйж байна.
Тэд маргааш буюу 7 дугаар сарын 5-ны өдөр эх орныхоо өмнөд цэг буюу Өмнөговь аймгийн Номгон сум Орвог гашууны бор толгой хүрснээр “Таван цэг” төсөл амжилттай хэрэгжиж, өндөрлөж буй нь энэ юм.
“Таван цэг”-ийн эмч дэслэгч Б.Золбоогийн мэдээлснээр Зэвсэгт хүчний 123 дугаар ангийн хөгжимчин ахлах ахлагч Э.Даваажамцад ердөө 56-хан км зам үлдээд байгаа бөгөөд өнөөдөр 25, маргааш 31 км замыг туулахаар төлөвлөжээ. Өмнөд цэгийн бүсэд ахлах ахлагч Э.Даваажамц, дэд ахлагч Б.Буянхишиг нар хамтдаа гүйж очих ба хилчин дайчид болон орон нутгийн иргэд түүхэн үйл явдлын гэрч болж, багаар онцгой амжилт үзүүлсэн алба хаагчдад баяр хүргэхээр цуглах гэнэ.
Энэ хугацаанд ахлах ахлагч Э.Даваажамц 95 хоногт 5000 хол давсан км замыг ийнхүү туулж байгаа бол дэд ахлагч Б.Буянхишиг 46 хоногт 2222 км замыг туулж, бүсгүй хүнд баймгүй тэсвэр хатуужлыг харуулж чадсан билээ.
“Таван цэг”-ийнхэн энэ хугацаанд Баян-Өлгий, Ховд, Говь-Алтай, Баянхонгор, Өвөрхангай, Булган, Төв аймаг, нийслэлийн Налайх, Багануур дүүрэг, Хэнтий, Сүхбаатар, Дорнод, Орхон, Булган, Хөвсгөл, Архангай, Өвөрхангай, Төв, Булган, Дундговь, Өмнөговь зэрэг давхардсан тоогоор 15 аймгийн 70 гаруй сумыг дамжин гүйсэн байна.
Мөн эх орныхоо түүхэн дурсгалт газрууд буюу эртний хотын туурь Аураг, Их бурхант цогцолбор, Халхын голын баатруудын дурсгалт газар, эртний нийслэл Хархориноор зочилж, цаатан, дархадын соёл уламжлалтай танилцаж сурталчлахын сацуу усчин дайчдын Хөвсгөл нуураас татан гаргасан “Сүхбаатар” хөлөг онгоцыг үзэж сонирхжээ.
Эх сурвалж: Хуурай замын ЦЭРЭГ
Сэтгэгдэл (0)
Сэтгэгдэл бичигдээгүй байна