Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч спортын мастер дэд ахлагч Б.Буянхишиг нар өнөөдөр /2025.04.23/ Баянхонгорын нутагт иржээ.
Тэд эх орныхоо түүх дурсгалт газар болон дөрвөн зүгийн хязгаарт орших Соёмбот баганыг төв цэгтэй холбосон таван цэгийн 5000 км замыг туулахаар 04 дүгээр сарын 2-ны өдөр Алтай таван богдын Сонгинотын даваанаас гараагаа эхлүүлсэн билээ.
Гүйгчид нийтийн биеийн тамирыг хөгжүүлэхэд өөрсдийн хувь нэмрээ оруулах, Зэвсэгт хүчнийхээ нэр хүндийг өргөж, монгол цэргүүдийн тэсвэр хатуужил, эр зоригийг харуулах, Монгол Улсын холын зайн гүйлтийн дээд амжилтыг багаар тогтоох зэрэг зорилгыг тээж яваа юм.
Энэ хугацаанд Баян-Өлгий, Ховд, Говь-Алтай аймгийн нутаг дэвсгэрийг дамжин гүйж, өнөөдөр /2025.04.23/ өглөө Баянхонгор аймгийн Бууцагаан сумын нутагт очжээ.
Э.Даваажамц, Б.Буянхишиг нар “Дэлгэрийн тал” хэмээн алдаршсан өндөр Алтайн тал хээрийн бүсийг амжилттай туулсан ба маргааш буюу 2025 оны дөрөвдүгээр сарын 24-ний өдөр 1000 дахь км зайдаа хүргэх төлөвлөгөөтэй байгаа гэнэ.
Марафон гүйгчдэд “Монголын хэт холын марафон гүйлтийн холбоо”-ныхон гүйлтийн спортыг олон нийтэд сурталчилж буйд нь талархал илэрхийлж, дэмжиж буйгаа илэрхийлээд байгаа юм.
Сэтгэгдэл (0)
Сэтгэгдэл бичигдээгүй байна