Алтай таван богдын Сонгинотын даваанаас яг нэг сарын өмнө гараагаа эхлүүлсэн Зэвсэгт хүчний 123 дугаар ангийн хөгжимчин, цэрэгжлийн спортын мастер ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч спортын мастер дэд ахлагч Б.Буянхишиг нар Монгол Улсын төв цэгийг чиглэн гүйж байна.
Хэт холын марафончид Баян-Өлгий, Ховд, Говь-Алтай, Баянхонгор аймгийг туулж, өнөөдөр Өвөрхангай аймгийн Арвайхээр хотыг дайран өнгөрч, өдгөө тус аймгийн Бүрд суманд байрлах Монгол Улсын төв цэгийг чиглэн гүйж байгаа юм.
Учир нь эх орныхоо 4 зүгийн хязгаарт орших Соёмбот баганыг төв цэгтэй холбосон 5000 км замыг туулах зорилгоор энэхүү гүйлтийг багаар эхлүүлсэн билээ.
Монгол орны төв цэгийн байршлыг 1979 онд газар зүйн шинжлэх ухааны эрдэмтэн Ш.Шагдар, Өвөрхангай аймгийн Бүрд сумын төв дэх "Онгон"гэдэг газраас урагш 13,5 км зайд байгаа Сант уулын өвөр, Өвөр хөшөөтийн булаг гэдэг газар гэж тодорхойлжээ.
Эрдэмтэн, профессор үүнийг нотлохдоо газарзүйн солбилцлын арга, тэгш өнцгийн арга, квадратын болон тойргийн аргаар тодорхойлон тогтоож хойд өргөргийн 46 градус 52 минут, зүүн уртрагийн 103 градус 50 минутын солбилцолд далайн түвшинээс 1690 метрт өргөгдсөн талбайд манай орны зүүн, баруун захаас адилхан 1219,5 км-т, хойт захын цэгээс 690 км, өмнөд цэгээс 600 км-т орших уг булгийг гэж үзсэн байна. Энэ цэгт одоо таван метр өндөр соёмбо бүхий суварга байдаг ажээ.
Сэтгэгдэл (0)
Сэтгэгдэл бичигдээгүй байна