Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч, спортын мастер дэд ахлагч Б.Буянхишиг нар эх орныхоо түүхт дурсгалт газар болон тусгаар тогтнолын үнэ цэнийг илэрхийлэх Соёмбот багануудыг төв цэгтэй холбосон 5000 км замыг туулахаар 17 дахь өдрөө гүйж байна.
Марафончид гараанаас гарснаас хойш өчигдрийн /2025.04.17/ байдлаар гурван аймаг буюу Баян-Өлгий, Ховд, Говь-Алтай аймгийн нутаг дэвсгэрийг дамжин 692 км замыг туулжээ.
Уудам шаргын говь гүйгчдийг анхны бороотой угтан авахын сацуу дэд ахлагч Б.Буянхишигийн аав Н.Буян-Өлзий, ээж Д.Цогзолсүрэн нар Булган аймгийн Хангал сумын Хялганат тосгоноос охиноо эргэхээр ирсэн нь том бэлэг байв. Тэд охиноороо бахархаж буйгаа дурдаж, алтан шар зам нь үргэлж ивээж явахын ерөөл өргөж байсан юм.
Говь-Алтай аймгийн Шарга сум нь Улаанбаатар хотоос баруун урагш 1090 км, Говь-Алтай аймгийн төвөөс 89 км зайтай, өмнө талаараа Алтайн нурууны салбар уулс болох Хар азаргын нуруу, Цагаан хайрхан зэрэг уулс, зүүн талаараа Хасагт хайрхан, Хан тайширын нуруу, хойд талаараа Дарвийн нуруугаар хүрээлэгдсэн Шаргын говьд оршдог.
Энэ нутаг нь вансэмбэрүү, алтан гагнуур, бамбай, сонгино, дэгд юмдүүжин, сэржмядаг, таван салаа, тарваган шийр, гоёо зэрэг эмийн ургамлаар баялаг билээ.
Сэтгэгдэл (0)
Сэтгэгдэл бичигдээгүй байна