Өнөөдөр Цагаачдын өдөр. 1990 оны 12 дугаар сарын 18-ны өдөр ажил хөдөлмөр эрхлэгч, цагаач тэдний гэр бүлийнхний эрхийг хамгаалах тухай конвенцийг Нэгдсэн Үндэсний Байгууллагын Ерөнхий Ассамблей баталсан юм.
Үүнээс хойш 10 жилийн дараа НҮБ-ын Ерөнхий Ассамблей энэ өдрийг Цагаачдын өдөр хэмээн баталж, жил бүр тэмдэглэж байхаар болж, НҮБ-ын гишүүн бүх улс орны Засгийн Газар, Засгийн Газрын бус байгууллагуудад цагаачдын талаар мэдээлэл түгээх, тэдний эрхийг хамгаалах талаар туршлага солилцож, цагаачдад туслах үйл ажиллагааг явуулахыг уриалсан байна.
Өнөөдөр уур амьсгалын өөрчлөлт, ган гачиг, хуурайшилт, звсэгт мөргөлдөөн, дайн самуунаас болоод хэдэн зуун, сая хүн орон гэрээ орхиод гадаад улс орон мөн өөрийн улс орон дотроо цагаачлан амьдарч байна.
Олон Улсын цагаачлалын байгууллагын тайланд дэлхий даяар өнөөдөр 281 сая хүн буюу манай гарагийн нийт хүн амын 3,6 хувь нь эх орноосоо дүрвэн бусад оронд цагаачлан амьдарч байгааг мэдээлжээ. Дүрвэгсдийн тоо 117 саяд хүрсэн нь түүхэнд байгаагүй өндөр үзүүлэлт юм. Тэдний 1/3 нь хавчлага, хүний эрхийг зөрчсөн болон бусад шалтгаанаар эх орноо орхиж байна.
Олон Улсын Хөдөлмөрийн Байгууллагын мэдээгээр 2022 оны эцэс гэхэд 167 сая 700 мянган хүн цагаачаар ажиллаж, амьдарч байгаа юм байна. Тэдний 102 сая 700 мянга нь эрэгтэй, 64 сая 900 мянга нь эмэгтэй байна. Энэ тоо 2013 он буюу 9 жилийн өмнөхөөс 30 саяар өссөн гэж тайланд дурджээ.
Сэтгэгдэл (0)
Сэтгэгдэл бичигдээгүй байна