Францын кино урлагийн домог, Дэлхийн кино ертөнцийн хамгийн царайлаг залуу хэмээх алдрын эзэн Ален Делон өнгөрсөн ням гаригт гэртээ үүрд амгалан нойрссон тухай түүний гурван хүүхэд гашуудлын үгэндээ дурдсан юм. Ален Делон 88 настай байлаа.
Тун адайр ааштай гэгддэг Ален Делоноос нэгэн сэтгүүлч “Таныг их муухай ааштай гэх юм?” хэмээн асуухад “Үгүй ээ, би зүгээр л ааштай хүн байхгүй юу” хэмээн хариулсан байдаг.
Тэгвэл зүгээр л ааштай жүжигчнийг таалал төгссөний дараагаар гурван хүүхэд нь 245 сая еврогоор үнэлэгдэх хөрөнгийг нь хэрхэн хуваан авах нь олны сонирхлыг онцгой их татаж байлаа. Жүжигчний нас дээр гарч, бие муудаад ирэх үед гурван хүүхэд нь хэвлэлээр дамжуулан хоорондоо хэрүүл зарга хийсэн Ерөнхийлөгч Эммануэль Макроны томоохон мэдэгдлүүдийг ч нам дарж байсан учраас хөрөнгийн асуудлыг хэрхэн шийдэх нь маш сонирхолтой сэдэв болжээ.
Гэвч Ален Делон гэрээслэлдээ өмч хөрөнгөө маш нарийн мөн тэнцвэртэй хуваасан тул гурван хүүхэд нь хэл ам хийдгүй бүгд хүлээн зөвшөөрсөн гэнэ. Ален Делон гурван хүүхэдтэй. Хоёрдахь эхнэр Натали Бартелемигаас мэндэлсэн Энтони одоо 59 настай бол загвар өмсөгч Розали ван Бременээс төрсөн Анушка охин 34-тэй, хүү Ален Фабьен 30-тай ажээ. Өөр нэгэн хүү Кристиан Булонь 2023 онд 62 насандаа ертөнцийн мөнх бусыг үзүүлсэн юм.
Ален Делон гэрээслэлдээ өмч хөрөнгөө хэрхэн өвлүүлэх талаар товч бөгөөд маш тодорхой дурдахдаа ганц охин Анушкадаа яг тал хувийг нь, харин үлдсэн хувийг хоёр хүүдээ яг тэнцүү хувааж өгнө гэж тэмдэглэсэн байжээ.
Сэтгэгдэл (0)
Сэтгэгдэл бичигдээгүй байна