“Нисдэг Честмир”, “Арабелла” гээд Үндэсний телевизээр гарч байсан киноны гол дүрүүдийг бүтээгчдийн нэг Чехословакийн жүжигчин Владимир Меншик 150 гаруй жүжиг, кинонд тоглож, хожмоо Чехийн түүхэн дэх Аугаа 100 эрхмийн нэгд нэрлэгдсэн нэгэн юм.
Меншик багаасаа урлагт дуртай, дажгүй сайхан дуулчихдаг хүү байж. Гэвч нүүр царайндаа их дурамжхан. Өөрийгөө царай муутай гэж бодохын зэрэгцээ шүдээ засуулж сайхан болгохсон гэж хүсдэг байжээ. Гэвч тэгж амжилгүй байсаар 58 насандаа өвчний улмаас нас баржээ.
Меншик бол инээдмийн жүжигчин. Гэхдээ эмгэнэлт драмд ч сайн тоглочихдог. Чехословакийн ард түмэн түүнд их хайртай байсан гэдэг. Мань хүн нэлээн зальтай. 1960-аад онд иргэний үнэмлэхээ гээчихэж. Ингээд шинийг авахаар болж л дээ. Шинэ иргэний үнэмлэх дээр төрсөн огноог нь ажилтан гараар бичиж өгөхдөө 1929 оны арын 9-ийн тооны дээд хэсгийг бүрэн дугуйлалгүй орхичихсон юм байна. Үүнийг анзаарсан Меншик өнөөх 9-ийн тоог 4 болгож эвтэйхэн засчихаж. Санаа нь бол таван жилийн өмнө ч болтугай тэтгэвэрт гараад амар жимэр амьдрах байлаа.
Иргэний үнэмлэх дээрээ таван жилээр залуужсан учир 1974 онд буюу 50 нас хүрэхэд нь Гавъяат жүжигчин цол хүртээв. Үнэндээ бол 45-тай хүртсэн хэрэг.
Харин 1984 онд Чехословакийн тухайн үеийн Ерөнхийлөгч Густав Гусак 60 нас хүрсэнд нь баяр хүргэж, захидал илгээж байжээ. Үнэндээ бол 55-тайдаа 60 насны баярын захиа авчихаж байгаа нь тэр.
Меншик тамхи их татдаг, хожмоо архинд донтсон учир архинаас гарах эмчилгээ хийлгэж дөрвөн жил амсаагүй ч гэлээ дахин “хальтарсан” байна. Түүнийг 58 насандаа өөд болоход дөрвөн хүүхэд нь аль хэдийнэ том болчихсон байжээ.
Харьцангуй эрт нас барсаны шалтгааныг насан туршдаа астматай байсантай нь холбон тайлбарладаг аж. “Астма бол миний бүсгүй шиг надаас салдаггүй эд” гэж хэлж байжээ. Одоо охин нь аавынхаа мэргэжлийг эзэмшсэн жүжигчин байдаг байна.
Сэтгэгдэл (0)
Сэтгэгдэл бичигдээгүй байна