ШИНЭ ТЕХНОЛОГИ, ИННОВАЦИЙГ ЭДИЙН ЗАСГИЙН ЭРГЭЛТЭД ОРУУЛАХ ТАЛААР "БҮҮТКАМП" СУРГАЛТ БОЛЖ БАЙНА

Дэлхий даяар дэлгэрч байгаа “Бүүткамп” эрчимт сургалтад хими, биологи, хөдөө аж ахуй, хүрээлэн буй орчин, материал судлал, нанотехнологи, ойн аж ахуй, ургамал хамгаалал, бизнес, нийгмийн инновац, санхүү хүний нөөц, чанарын менежментийн салбарын 30 залуу энтерпрёнершип судлаач 2024 оны дөрөвдүгээр сарын 1-5-ны өдрүүдэд болж байна.

Бүүткамп эрчимт сургалт нь байгаль, инженер, технологи, нийгэм, хүмүүнлэгийн салбарын судлаачид, залуу энтерпрёнерүүд, их дээд сургуулийн багш, ахисан түвшний суралцагчдыг чадавхжуулах, ялангуяа мэргэжилтнүүд мэдлэг солилцох, хамтран инновац бүтээх арга замд суралцах, гарааны компани байгуулах, өөрсдийн шинэ, шилдэг санааг бодит ажил болгох, шинжлэх ухааны мэдлэг, шинэ технологи, инновацийг эдийн засгийн эргэлтэд оруулах ялангуяа салбар дундын практик мэдлэгүүдийг богино хугацаанд заадгаараа онцлогтой.

Дэлхийн 10 гаруй оронд амжилттай зохион байгуулагдаж нийт 106 судлаач, инженер, энтерпрёнерууд хамрагдсан тус сургалтыг манай улсад  анх удаа ЮНЕСКО, БШУЯ, МУИС, МУИС-ийн Шинжлэх ухаан технологийн Улаанбаатар парк хамтран зохион байгуулж байгаа юм.

“UNESCO Science-Engineering Entrepreneurship Bootcamp in Mongolia 2024” буюу энэ удаагийн эрчимт сургалтад их дээд сургуулийн сургалтын байгууллага, эрдэм шинжилгээний хүрээлэн, шинжлэх ухааны парк, нийслэлийн инновац бодлогын газар, хувийн хэвшлийн зэрэг нийт 14 байгууллагын 50 гаруй судлаачид, их дээд сургуулийн ахисан түвшний суралцагчид сонгон шалгаруулалтад оржээ.

Сургалтын үр дүнд суралцагчид багт хувиарлагдан богино хугацаанд өөрсдийн бизнесийн загварыг боловсруулан, гарааны бизнесийг эхлүүлэх, санхүүжилтийг тооцоолох, гарааны бизнест зориулсан хууль эрх зүйн гэрээ, хэлэлцээр хийх, хэлэлцээрийн элементүүдэд суралцахын зэрэгцээ өөрсдийн төслөөрөө хэрхэн хөрөнгө оруулагчдыг татахад суралцаж, мөн хөрш орнуудын лаборатори, нанотехнологийн бүтээгдэхүүнийг виртуалиар үзэж танилцана.

Шинжлэх ухааны хөгжил, түүнийг хэрэглээний эргэлтэд оруулахад их сургуулиуд шийдвэрлэх үүрэг гүйцэтгэж байна. Зөвхөн МУИС-д байгаа 50 гаруй патент, зохиогчийн эрх, ашигтай загварын зэрэг хэдэн зуун оюуны өмчийг үйлдвэрлэлд нэвтрүүлэхэд улс орны хөгжилд чухал үүрэг гүйцэтгэх юм. Энэ зорилтыг хэрэгжүүлэх үүднээс төр-их сургууль-үйлдвэрлэл бизнесийн уялдаа холбоог тогтвортой  бэхжүүлэх зорилго бүхий их сургуулийн дэргэдэх анхны шинжлэх ухааны парк болох МУИС-ийн Шинжлэх Ухаан Технологийн Улаанбаатар парк 2023 онд байгуулагдаж, үйл ажиллагаагаа эхлүүлээд байна.