ТЭСЭХИЙН АРГАГҮЙ ӨВДӨХӨД КИАНУ МИНИЙ ГАРЫГ АТГАЖ, ТАЙВШРУУЛДАГ БАЙЛАА

Холливудын жүжигчин Киану Ривз бол бага, залуу наснаасаа зовлон үзсэн. Зовлон гээч юу байдгийг мэдэх энэрэнгүй нэгэн гэж олон удаа уншиж байлаа.

Гурван настайдаа аавдаа хаягдсан. Магадгүй түүнээсээ болоод бага зэрэг омголон ширүүн зантай хүү болсон гэдэг. Бас ярианы чадвар их муутай. Зан чанар, хэлний бэрхшээлээсээ болоод олон сургууль сольсон гэж байгаа.
1998 онд Женнифер Сайм гэх бүсгүйтэй хамт амьдарч эхэлсэн. Харамсалтай нь хүүхэд нь зулбаж, хос хоёр сэтгэл санааны маш хүнд байдалд оржээ. Үүнийхээ дараа хамт амьдрахаа больж, найзууд байхаар шийджээ. 2001 онд Мэрлин Мэнсоны үдэшлэгт Саймын хамт очсон гэдэг. Сайм нэлээн ууж халамцсан учир зочдын нэгээр гэртээ хүргүүлэх болжээ. Харамсалтай нь гэртээ хүргүүлэх замд авто осолд орж, Сайм өөд болсон юм. Мөн хамгийн сайн найз Фил Финикс нь ч орь залуугаараа өөд болсон.
Киану Ривзийн амьдралд тохиолдсон өөр нэгэн зовлон бол төрсөн дүү охин Ким нь цусны хорт хавдартай гэсэн онош тавиулж, эмчилгээ хийлгэж эхэлсэн нь байлаа.
Дүүгээ өвдмөгц Киану тансаг харшаа зараад, дүүгийнхээ ойролцоо жирийн нэгэн байшин авч, хамаг мөнгөө эмчилгээнд нь зарцуулах болжээ. Зөвхөн мөнгөөр ч туслаад зогсохгүй, хоол хийх, гэр орныг нь цэвэрлэх гээд бүхий л ажлыг өөрөө бие даан хийж эхэлсэн байна.
“Тэсэхийн аргагүй өвдөхөд Киану миний гарыг атгаж, тайвшруулдаг байлаа” гэж хожим Ким өгүүлсэн юм. 10 орчим жил хорт хадвартай тэмцсэний дараагаар аймшигт өвчнийг дүү нь даван туулж гарч чаджээ.
Алдартай “Матрикс” киноны зураг авалтыг хэдэн ч удаа хойшлуулж, хүлээлгэж дүүдээ очдог байсан гэнэ билээ. Дүүгээ өвдсөн тэр үед Киану энэ өвчний учир шалтгааныг тогтоох, эмчилгээнд юу үр ашигтайг олж мэдэхээр судалгааны ажилд эрдэмтдийг дайчилж, 31.5 сая ам.долларыг зарцуулсан байна.
“Надад сайн үйлсийн сан бий. Гэхдээ би өөрийнхөө нэрээр нэрлээгүй. Ер нь тэр ажилд өөрийгөө хамаатуулах дургүй. Тэр хүмүүс ажлаа л хийсэн шиг хийх ёстой гэж боддог” хэмээн нэгэн ярилцлагадаа Киану өгүүлж байжээ.
“Миний ах бол жинхэнэ ханхүү. Миний үг бүрийг маш анхааралтай сонсож, хүсэл бүрийг минь биелүүлэхийг зорьдог” хэмээн Ким өгүүлсэн байдаг.

Р.ГЭГЭЭ