63 настай жүжигчин бүсгүй Миланы загварын долоо хоногийн үеэр олны өмнө гарахдаа өөрийн онцлог болсон урт хар үсээ “халж”, “нойтон эффекттэй” богино боб засалтаар төрхөө өөрчилсөн байна.
Тэрбээр энэхүү огцом өөрчлөлттэй дүр төрхөөрөө хоёрдугаар сарын 26-нд болсон Gucci-гийн FW26 загварын шоуг үзэхээр иржээ.
Мурын шинэ үсний засалтыг алдарт үсчин Димитрис Яннетос хийсэн бөгөөд тэр инстаграм дахь нийтлэлдээ уг засалтыг “Demi-tris BoB” хэмээн нэрлэсэн байна.
Димитрис Яннетос “Би Дэми Мурд зориулж Gucci-гийн уран бүтээл эрхэлсэн захирал Демнагийн шоунд маш зоримог, загварын өндөр мэдрэмжтэй төрх бүрдүүлэхийг хүссэн. Шинэ цуглуулгын силуэтүүдээс санаа авсан. Мөрнөөс дээш богино, маш гялалзсан нойтон эффекктэй боб засалт нь түүний төрхийг төгс харагдуулна гэж би мэдэрсэн. Энэ бол Демигийн хувьд том өөрчлөлт -бид түүнийг өмнө нь ийм байдлаар харж байгаагүй. Тэр маш догь, хичээгээгүй мэт энгийн атлаа чамин, орчин үеийн харагдаж байна. Мөн энэ нь түүний зан чанарыг тодотгож өгч байна.” гэж хэвлэлд мэдэгджээ.
Шоун дээр Дэми Мур өөрийн шинэ этгээд үс засалтаа савхин хувцастай хослуулсан байна. Тэрбээр хар савхин бариу хүрэм, нарийн эсгүүртэй өмд өмссөн бөгөөд энэхүү төрхийг алдарт стилист Брэд Горескитэй хамтран бүрдүүлснээ тэд инстаграм дахь нийтлэлээрээ хуваалцжээ.
Мур хар өнгийн том шил зүүж, өндөр өсгийт өмсөж, гар цүнх барьж, дүр төрхөө бүрдүүлжээ. Gucci-гийн уран бүтээл эрхэлсэн захирал Демна Гвасалия энэхүү дүр төрхийг бүтээсэн гэж тус нийтлэлд дурдсан байна.
Дэми Мур Gucci-гийн шоунд оролцохдоо дүр төрхдөө бас нэг онцгой элемент нэмсэн нь түүний алдарт бяцхан нохой Пилаф байлаа. Тэр нэг гартаа цүнхээ барьж, нөгөө гартаа өөрийн жижигхэн чихуахуа нохойгоо тэвэрч ирсэн байна. Elle сэтгүүл энэхүү төрхийг 1990-ээд оны сүүл үе болон Том Фордын брэндийн үеийн чиг хандлагыг илэрхийлсэн хэмээн тодорхойлжээ.
Мур нэгдүгээр сард People сэтгүүлд ярилцлага өгөхдөө түүний бэлгэ тэмдэг болсон урт үс болон өнгөрсөн жилүүдэд туршиж байсан илүү зоригтой засалтуудынхаа тухай нээлттэй ярьсан юм. “Би туршиж, тоглох дуртай.” хэмээн Дэми Мур хэлээд “Миний үс олон амьдралаар амьдарсан” гэжээ.
Түүний гоо сайхны талаарх ойлголтод хамгийн их нөлөөлсөн засалт бол 1997 онд тоглосон G.I. Jane кинонд дүрдээ зориулж үсээ хусуулсан явдал байжээ. Мурын хэлснээр энэ зоримог засалт нь хамгийн их ухаарал өгсөн туршлага байсан бөгөөд үсээ улам ихээр үнэлж хайрлахад минь хүргэсэн гэнэ. Гэхдээ Дэми Мур эцсийн эцэст байнга урт үсээ сонгодог гэдгээ хэлжээ. Тэр үүнийг энгийн болохоор нь илүүд үздэг байна.
“Урт үс л надад хамгийн их тохирдог. Саналын дагуу үсээ засах, өөрчлөх нь миний “шинэчлэгдэх” хүслийг хангадаг ч өдрийн төгсгөлд би үсээ задгайлж, унжуулаад бүсэлхий шүргэсэн уртыг нь харах дуртай. Энэ нь гэртээ ирсэн мэт мэдрэмж төрүүлдэг.” гэж тэр ярилцлагадаа дурдсан байдаг.
Дэми Мурын Cucci-ийн загварын шоунд ирэхдээ "гоёсон" зоримог "нойтон эффекттэй" богино боб засалт нь түүнийг залуухан, халуухан харагдуулж байна гэж олон хүн үзэж байна.
Сэтгэгдэл (0)
Сэтгэгдэл бичигдээгүй байна