Японы уран гулгагчид, Олимпын хоёр удаагийн мөнгөн медальт, Дэлхийн хоёр удаагийн аварга Рику Миура, Рюичи Кихара нар 2026 оны Олимпын наадамд чөлөөт үзүүлбэрт дэлхийн дээд амжилт тогтоон, хосын төрөлд аваргаллаа.
Тэд богино болон чөлөөт үзүүлбэрийн нийлбэр дүнгээр шүүгчдээс 231.24 оноо авсан юм. Миура, Кихара нар богино үзүүлбэрийн дараа тавдугаар байрт явж байсан ч чөлөөт үзүүлбэртээ дээд амжилт тогтоосноор Олимпын аварга болж чадав.
Анастасия Метёлкина, Лука Берулава нар 221.75 оноогоор мөнгөн медаль авч, Өвлийн Олимпын наадмын түүхэн дэх Гүржийн анхны медалийг авчирлаа. Мөн энэ нь тус улсын уран гулгалтын спортын төрөл дэх анхны олимпын медаль болж байна.
Гүрж улс Олимпын наадмуудаас нийт 47 медаль хүртсэн боловч эдгээр нь бүгд зуны Олимпынх байдаг. Гүржийн тамирчид хамгийн олон медалийг бөхийн төрлөөс авсан байдаг, тухайлбал чөлөөт бөхөөс 21 медаль, жүдо бөхөөс 15 медаль хүртсэн байдаг аж.
Харин Германы Хазе, Володин нар богино үзүүлбэрийн дараа тэмцээнийг тэргүүлж байсан ч чөлөөт үзүүлбэрийн оноогоор дөрөвдүгээр байрт бичигдэж, нийлбэр оноогоороо хүрэл медаль хүртсэн.
Уран гулгалт. Хосын төрлийн дүн:
Японы хос Рику Миура, Рюичи Кихара нар Олимпын наадамд чөлөөт үзүүлбэрт дэлхийн шинэ дээд амжилт тогтоож, ОХУ-ын тамирчин Анастасия Мишина, Александр Галлямов нарын амжилтыг эвдсэний дараа Камила Валиева дэлхийн дээд амжилтуудыг эзэмшиж буй цорын ганц орос тамирчин болж үлдэв.
Камила Валиева эмэгтэйчүүдийн ганцаарчилсан төрөлд богино үзүүлбэр, чөлөөт үзүүлбэр болон нийлбэр онооны бүх гурван дэлхийн дээд амжилтыг эзэмшдэг бөгөөд эдгээрийг тэрбээр 15 насандаа 2021 оны арваннэгдүгээр сард болсон “Ростелекомын цом” тэмцээний үеэр тогтоосон юм.
Сэтгэгдэл (0)
Сэтгэгдэл бичигдээгүй байна