ИЛ ТОД МЭДЭЭЛЭХ СИСТЕМ НЭВТРҮҮЛСНЭЭР ЭМИЙН ҮНИЙН ЗӨРҮҮ БАГАСЖЭЭ

Эрүүл мэндийн яамнаас өнөөдөр /2026.02.12/ цаг үеийн асуудлаар хэвлэлийн хурал зохион байгуулж, Эрүүл мэндийн сайд, дэд сайд, Төрийн нарийн бичгийн дарга, яамны газрын дарга нар, Эрүүл мэндийн даатгалын ерөнхий газар, ХӨСҮТ, ГССҮТ-ийн дарга нар зэрэг өргөн бүрэлдэхүүнтэйгээр мэдээлэл хийж, сэтгүүлчдийн асуултад нээлттэй хариулж байна. 

Эрүүл мэндийн сайд Ж.Чинбүрэн хэвлэлийн хурлыг нээж хэлсэн үгэндээ  нийгмийн эрүүл мэндийн томоохон тогтолцоо Монгол Улсад бүрдэх чухал шийдвэрийг Засгийн газрын өчигдрийн (2025.2.11) хуралдаанаас гаргасныг онцлов. 

Энэ нь Өвчний хяналт, сэргийлэлтийн үндэсний төв байгуулахыг дэмжсэн явдал юм. Тус төв байгуулагдсанаар өвчин гарсны дараа аргацаан эмчлэх бус, эрсдэлийг урьдчилан илрүүлж, эрт сэрэмжлүүлэх, болзошгүй аюулыг шинжлэх ухааны үндэслэлтэй үнэлэн, салбар хоорондын уялдаа холбоог нэг цэгээс зангидах үндэсний хэмжээний чадамж бий болно..   

Эрүүл мэндийн сайд Ж.Чинбүрэн эмийн үнийг ил тод мэдээлэх системийн талаар одоогоос гурван сар гаруйн өмнө мэдээлж, тэндээс иргэд эмийн үнэ, байршлын хамт нээлттэй харж болно гэж мэдэгдсэн. https://em.hdc.gov.mn/ хаягаар нэвтрэн эмийн үнэ хаана хэдэн төгрөг байгаа, хэрэглэх заавар, хориглох зүйлстэй танилцаж болох энэ системийг иргэдэд нээлттэй болгосноор үнийн зөрүү ойролцоо болсон байна гээд аспирин 81 дээр жишээ авав. Тухайлбал, одоогоос 3 сар гаруйн өмнө уг системийг танилцуулахад аспирины үнэ эмийн сангуудад өөр өөр, тухайлбал 5000-10000 төгрөгийн зөрүүтэй байсан бол одоо хамаагүй буурсан байгааг бодитоор систем дээр харуулсан юм. Дэлгэц дээр харуулсан үнийн дүнгээр эмийн сангуудад аспирин 81 болон ижил төстэй бүтээгдэхүүнүүд 10500-11700 орчим төгрөгийн үнэтэй буюу 1000 гаруй төгрөгөөс хэтрэхгүй зөрүүтэй байсан юм. 

Гэхдээ цаашид ч иргэд эмийн үнэд илүү анхаарал хандуулах, энэ системийг ашиглах хэрэгтэй байна, одоогоор 36000 орчим хүн хандаад байгааг өсгөх шаардлагатай тул олон нийтэд сурталчлах хэрэгтэй гэж үзэж буйгаа Ж.Чинбүрэн сайд илэрхийлэв. 

Хэвлэлийн хурлаар CDC буюу Өвчний хяналт, сэргийлэлтийн үндэсний төв байгуулах Засгийн газрын шийдвэр, улаанбурхан өвчний нөхцөл байдал, дархлаажуулалт, хаврын бэлтгэл, цагаан сарын баярын үеэр эрүүл мэндэд учирч болзошгүй эрсдэлээс сэргийлэх зөвлөмж, Эрүүл мэндийн салбарын эмч, ажилтнуудын цалингийн асуудал, эмийн үнэ болон эмийн сангийн байршлын мэдээллийн систем, түүний хэрэглээ, иргэд эрүүл мэндийн үйлчилгээ авсан эсэхээ шалгах боломж, заавар зэргийн талаар маш тодорхой мэдээллийг өгөв.