ОНЦГОЙ БАЙДЛЫН АВРАГЧИД БОЛ ЧИМЭЭГҮЙ БААТРУУД

-УБ-СОНГДО ЭМНЭЛЭГ ОНЦГОЙ БАЙДЛЫН 15 АЛБАН ХААГЧИЙГ ШИНЖИЛГЭЭНД ХАМРУУЛАВ-

УБ-Сонгдо эмнэлэг нийгмийн хариуцлагын хүрээнд Онцгой байдлын байгууллагын 15 ажилтан, алба хаагчийг бүтэн биеийн шинжилгээнд үнэ төлбөргүй хамруулжээ.
Тус эмнэлгийн Бизнес хөгжлийн албаны дарга Д.Одбаяр хэлсэн үгэндээ “Онцгой байдлын байгууллагын аврагчид бол чимээгүй баатрууд гэж бид боддог. Хаана гал түймэр, үер усны гамшиг болно, тэнд аврагчид л байдаг. Эмч нарын адилаар хүний алтан амийг аврахыг гол зорилгоо болгон ажилладаг. Бид ОБЕГ-ын Эрүүл мэндийн тасгийн хөдөлмөрийн эрүүл ахуй хариуцсан мэргэжилтэн, ахмад Ц.Даваацэрэнтэй хамтран судалгаа хийсний үр дүнд ажилчдын ажиллах орчин нөхцөлд нь тохируулан багцын шинжилгээгээ бүрдүүлсэн. Тухайлбал хортой, доргилттой, халуун, бүгчим гээд цаг агаарын хүнд нөхцөлд алба хаадаг учир илүү нарийвчилсан шинжилгээнд хамруулахыг зорьсон” хэмээн онцолжээ.
Шинжилгээнд хамруулсан ажилтан, алба хаагчид нь18-40 насныхан бөгөөд эрэгтэй, эмэгтэй гэсэн хоёр төрлийн багцын шинжилгээ хийлгэжээ. Тухайлбал, ходоодны дуран, зүрх, хэвлийн эхо, зүрхний бичлэг, хөхний рентген, нойр булчирхай, бөөрний шинжилгээ, эмчийн үзлэгүүд ч багтсан байна.