Уран гулгалтын од, ОХУ-ын тамирчин Камила Валиева их спортод эргэн ирж, маргааш /2026.01.31/мөсөн дээр гарна. Тэрбээр 2026 оны 1 дүгээр сарын 31-нээс 2 дугаар сарын 1-нд Москвад болох ОХУ-ын Уран гулгалтын үсрэлтийн аварга шалгаруулах тэмцээнд оролцох юм.
Энэ нь түүний завсарлага авснаас хойших анхны албан ёсны тэмцээн болох бөгөөд уг хугацаанд Валиева бэлтгэлдээ эргэн орж, мөсөн дээр өндөр төвшний хүнд элементүүдийг гүйцэтгэж буйгаа Оросын Нэгдүгээр суваг телевиз болон цахим сүлжээн дэх бичлэгээр харуулжээ.
Нэгдүгээр суваг өчигдөр /2026.01.29/ түүний бэлтгэлийн үеийн бичлэгийг цацсан бөгөөд Валиева дөрөв эргэлттэй тулуп үсрэлтийг амжилттай гүйцэтгэсэн байна. Мөн цахим сүлжээнд ч түүний дөрөв эргэлттэй тулуп үсрэлтийн бичлэг тавигдсан юм. Ийнхүү Валиева өмнө нь амжилтад хүргэсэн техникээ сэргээхээр идэвхтэй ажиллаж байна.
Онцгой авьяастай Камилагийн энэхүү бичлэг түүний шүтэн бишрэгчдэд том хүлээлт үүсгээд байна. Харин Камила Валиева Нэгдүгээр сувгийн сурвалжилгад удахгүй болох ОХУ-ын Уран гулгалтын үсрэлтийн аварга шалгаруулах тэмцээний талаарх бодлоо хуваалцахдаа "Топ формтой байна гэж хэлэхгүй" гэсэн байна.
Камила «Эцэст нь олны өмнө гарч, өөрийн дуртай ажлаа хийх болсондоо маш их баяртай байна. Ер нь тэмцээний үзэгчдийг дахин харж, тэр адреналиныг мэдрэхийг хүсэж байна» гэжээ.
Валиева мэргэжлийн спортод зайлшгүй тохиолддог гэмтэл, өвдөлтийн талаар бодохгүй байгаагаа хэлсэн ч тэмцээний уур амьсгал, бусад уран гулгагчидтай харилцах тэр орчныг маш их үгүйлсэн гэжээ. Бэлтгэлийн явцад өөрийнхөө хүлээлтээс давснаа ч тэр мэдэгдсэн юм.
"Шударгаар хэлэхэд, би өөрийнхөө хүлээлтээс давсан. 3–3-ыг удахгүй л бүрдүүлнэ гэж бодож байсан. Зүгээр ээ, аажмаар ажиллаж, аажмаар хэлбэртээ орж байна» гээд ойрын үед дээд формоо харуулахыг зорихгүй байгаагаа онцолсон.
«Энэ миний топ форм байна гэж хэлэхгүй — зүгээр л олны өмнө гарч, үсэрч, мөсийг мэдрэхийг хүсэж байна. Бүх зүйл сайхан, бүх зүйл супер» хэмээн Нэгдүгээр суваг түүний үгийг эшилжээ.
Ийнхүү уран гулгалтын "домог" Камила Валиевагийн албан ёсны эргэн ирэлт ОХУ-ын аварга шалгаруулах тэмцээнээр эхлэхэд цөөхөн цаг үлдээд байна.
Маргааш эхлэх ОХУ-ын уран гулгалтын аварга шалгаруулах тэмцээн нь оны хамгийн том үйл явдлуудын нэг болно гэж олон нийт үзэж байна. Учир нь Оросын уран гулгалтад дуулиан тарьсан гурван эргэн ирэлтийн хоёрыг энд харна. Камила Валиевагаас гадна Александра Трусова хүүхэд төрүүлснийхээ дараа анх удаа тэмцээний мөсөн дээр гарах юм.
Од тамирчид “ультра-си” элементтэй, ялалтад тэмүүлж буй залуу уран гулгагчидтай өрсөлдөх энэ тэмцээн "гал гарсан" сонирхолтой болно гэж уран гулгалт сонирхогчид үзэж, хүлээж байна.
Сэтгэгдэл (0)
Сэтгэгдэл бичигдээгүй байна