Монгол залуус минь эх орныхоо нэр хүндийг дэлхий даяар дуурсгасан сайхан жил байлаа. The MongolZ, дуучин Ж.Мишээл, Physical Asia гээд л залуус маань бор зүрхээрээ, сэтгэл хөдөлмөрөөрөө өөрийн нэрийг дуурсгалаа. Physical Asia-гаас үүдэлтэйгээр Netflix ирэх оны эхний шоугаа Welcome To Mongolia-аар эхэлж байна. Сайхаан...
Гэхдээ ирэх жил улсынхаа нэрийг дэлхий дахинд дуурсгах дахин нэг том үйл явдал Монголд болно. Энэ бол Цөлжилттэй тэмцэх асуудлаарх НҮБ-ын конвенцийн хурал буюу COP17.
Дэлхийн 197 орны удирдагч, сайд нар, эрдэмтэд, байгаль орчны чиглэлийнхэн, хувийн хэвшлийнхэн гээд нийт 10 мянган хүн Монголд цуглана. Үндэсний цэцэрлэгт хүрээлэнд арав гаруй хоногийн турш үргэлжлэх хуралд Монголын иргэн бүр цахимаар бүрдүүлээд орох боломжтой. Үг, саналаа чөлөөтэй хэлж болно. Байгаль эхээ дээдэлдэг бүх монгол хүнд нээлттэй. Малчид минь яая даа гэж буй бэлчээрээ, эрдэмтэд нь энэ чиглэлд ажил хийх гэсэн ч эрдэм шинжилгээний хөрөнгө дутуу байгааг, хувийн хэвшлийнхэн нь ногоон бүтээгдэхүүн гаргавал ашиг олох боломжтой эсэхээ ер нь л тулгамдсан бүх асуудлаа ярилцах боломжтой.
Мэдээж ирсэн зочдоос зарим нь тухлан үлдэж хөдөө нутгийн минь гоо сайхантай танилцана. Ногоон эдийн засаг гэж юу вэ, тэрэнд яагаад бүгд хөрөнгө оруулаад байна вэ. Нэг л агаар мандалтай нэг л дэлхийтэй учир бусдад хөрөнгө оруулах нь өөрсдөд нь ч хэрэгтэй гэдгийг дэлхий нийтээрээ олйгодог болжээ. Эзэн орны хувьд онгон дагшин байгаль минь яаж эвдэж сүйдсэнийг харуулангаа тусламж, хөрөнгө оруулалт авах боломж бидэнд байна.
Эцэст нь бид байгалиа ч хамгаалж, хөрөнгө оруулалттай ч болж чадна.
Дэлхий нийтийн анхаарлыг эх орны минь зүг татах COP17 хурал эхлэх хүртэл 240 гаруйхан хоног үлдээд байна. Бэлтгэлээ сайн хийж, сайхан давж гараад үр өгөөжийг нь ч хүртэж, байгаль ээжээ баярлуулах юм шүү, бүгдээрээ.
Сэтгэгдэл (0)
Сэтгэгдэл бичигдээгүй байна