СОР17 ЭДИЙН ЗАСГИЙН АЧ ХОЛБОГДОЛ НЬ ЮУ ВЭ?

Ирэх 2026 онд манай улсад болох Цөлжилттэй тэмцэх асуудлаарх хурал буюу COP17-ын  эдийн засгийн ач холбогдол юу вэ?

Хамгийн энгийн хэдэн зүйлийг дурдъя.

-Аялал жуулчлалын хувьд маш том ач холбогдолтой. Ирэх наймдугаар сард болох хурлын үеэр манайд 197 орны 10 мянга гаруй хүн ирнэ. Мэдээж ажлаар л даа, COP17-д оролцох гэж ирнэ. Гэхдээ тэд Монголын дотоодын эдийн засагт худалдан авалт хийж тэр хэмжээгээрээ багагүй валют орж ирэх нь тодорхой.

-Ирэх хүмүүсийн дотор өндөр хэмжээний зочид буюу шийдвэр гаргах түвшнийхэн бий. Төр засгийн удирдагчид, Байгаль орчны сайд нар. Эдгээр хүмүүсийн гаргах бодлогын шинжтэй шийдвэр манай улсын талхлагдсан бэлчээр, цөлжилтөд ихээр нөлөөлөх нь мэдээж. Нөгөө талаас тэд мөн өөр чиглэлийн холбогдох албан тушаалтнуудтай уулзана. Ийм хэмжээний зочидтой эх орныхоо байгаль орчноос гадна бусад салбарт оруулах хөрөнгө оруулалтыг ч ярих нь ээ.

-Хөгжиж байгаа, буурай хөгжилтэй орнуудад COP хамгийн том бизнес аялал жуулчлал болдог. Нислэгийн билет, буудал, бусад худалдан авалт гээд бүх зүйл нь хувийн хэвшилд орлого болж ордог.

-Түншлэл хөрөнгө оруулалт аль ч салбарт татахад хөшүүрэг болох томоохон боломж бий болно гэсэн үг. Манай улсын дэвшүүлэх санаачилгын нэг нь дэд бүтцэд ээлтэй хувийн хэвшлийн хөрөнгө оруулалт байх юм. Тиймээс манай бизнес эрхлэгчид дотооддоо гадаадын түншүүдтэйгээ ярилцах, байдлаа танилцуулах сайхан боломж үүснэ гэсэн үг.

-Мэдээж хамгийн том нь эх болсон байгальдаа оруулах хөрөнгө оруулалт. Манай улс багадаа 500 сая ам.долларын хөрөнгө оруулалт орно гэж тооцож буй талаар сайд нь ярьсан. Үүнээс ч илүүг олох боломж хангалтттай байгаа нь тодорхой.

Ногоон байгальд оруулсан бүхэн хөрөнгө оруулалт болж буй дэлхий ертөнцөд бид амьдарч байна. Тийм ч учраас байгалиа хамгаалангаа сэргээнгээ эдийн засагтаа хөрөнгө оруулах том боломж бол COP17 юм.