Сингапурт 2025 оны 11 дүгээр сарын 13-нд болсон “Wicked: For Good” киноны нээлтэд зориулсан улаан хивсний ёслолын үеэр хашлага дээгүүр үсэрч, гүйж ирээд Ариана Грандег тэвэрч авсан залууг тус улсын шүүх олон нийтэд төвөг учруулсан гэж буруутгажээ.
Тухайн үйл явдлын үеэр Грандегийн хамтран тоглогч, жүжигчин Синтия Эриво түүнийг хамгаалж, халдлага үйлдэгчийг холдуулсан юм.
Австралийн иргэн 26 настай Жонсон Вэн гэм буруугаа хүлээж байгаа бөгөөд инстаграм дээр pajamamann буюу “пижамтай эр”гэсэн хаягтай түүний үйлдлийг олон хүн эрүүгийн гэмт хэрэг гэж үзэж байгаа юм.
Ариана Гранде болон хамтран тоглосон жүжигчдийн 11-р сарын 21-нд нээлтээ хийх киногоо сурталчлах аялал удахгүй дуусна.
Сүүлийн жилүүдэд улаан хивсний ёслолын үеэр жүжигчдэд “халдах” нь улам бүр ихсэж байгаа юм.
Жонсон Вэн одыг тэврээд зургаа авахуулахыг оролдсон бөгөөд хамгаалалтын албаныхан түүнийг холдуулахаас өмнө Гранде цочирдож, чичирч байгаа дүр зураг камерт үлджээ.
Вэнийн хувьд энэ нь одод руу “халдсан” анхны тохиолдол биш юм. Өмнө нь тэр 2025 оны зургадугаар сард болсон тоглолтынх нь үеэр Кэти Перрид, мөн Chainsmokers-т ч ийнхүү “халдаж” байсан аж. Мөн 2023 оны FIFA-гийн эмэгтэйчүүдийн дэлхийн аварга шалгаруулах тэмцээний финал болон 2024 оны Парисын олимпийн уралдааны үеэр “халдлага” үйлдэхийг оролдож байсан гэнэ.
Жонсон Вэн дуучны шүтэн бишрэгч гэдгээ онцолж, түүнийг "Хатан" хэмээжээ. Тэрбээр инстаграмд болсон явдлын тухай бичлэгээ нийтлээд “"Эрхэм Ариана Гранде минь, чамтай хамт улаан хивсэн дээр үсрэх боломж олгосонд баярлалаа” гэж бичсэн байна.
Жонсон Вэнийг "Wicked: For Good" киноны нээлтийн үеэр хамгаалалтын албаныхан дагуулан явсны дараа удалгүй инстаграмдаа "эрх чөлөөтэй болсон" гэж мэдэгдсэн байна. Түүний гэм буруутай нь тогтоогдвол 1500 долларын торгууль төлөх, гурван сар баривчлах, эсвэл энэ хоёр ялыг хоёуланг нь оноож магадгүй юм. Жонсон Вэнийг шүүх хурал арваннэгдүгээр сарын 17-нд болох гэнэ.
Австралийн хэвлэлд мэдээлснээр 2025 оны 6 дугаар сард Кэти Перри рүү "халдах" үедээ Вэн ажилгүй байсан бөгөөд уг үйл явдлын улмаас 20,000 долларын торгууль төлсөн байна.
Ариана Гранде болсон явдлын талаар яриагүй ч 11 дүгээр сарын 14-нд нээлтийн үеэр авсан зургуудаа инстаграмдаа нийтэлж, "Баярлалаа, Сингапур. Бид чамд хайртай" хэмээн бичжээ.
Сэтгэгдэл (0)
Сэтгэгдэл бичигдээгүй байна