Зэвсэгт хүчний 017 дугаар анги, Нийслэлийн Баянгол дүүргийн засаг даргын тамгын газрын цэргийн штабтай хамтран “БИД ЭХ ОРНЫ ИРЭЭДҮЙ” сэдэвт нээлттэй хаалганы өдөрлөгийг зохион байгуулжээ.
Батлан хамгаалах яамнаас 2025 оныг “Эх оронч Монгол-Их сэргэлтийн жил” болгон зарласантай холбогдуулан Батлан хамгаалах бодлого, зорилго, зорилт, Зэвсэгт хүчний үйл ажиллагааг сурталчлах, хүүхэд залуучуудад цэргийн албаар дамжуулан цэрэг эх оронч хүмүүжлийг түгээн дэлгэрүүлэх, иргэн-цэргийн xамтын ажиллагаar бэхжүүлэх ажлын хүрээнд тус өдөрлөгийг зохион байгуулсан байна.
Уг арга хэмжээнд Баянгол дүүргийн Засаг даргын Тамгын газрын дарга Б.Мөнгөнхуяг, цэргийн штабын дарга хурандаа Л.Цэрэгбаяр, Баянгол дүүргийн 1, 2, 4, 5, 27, 28 дугаар хороодын Засаг дарга нар болон Нийслэлийн Ерөнхий боловсролын 20, 38, 51, 56 дугаар сургуулиуд, “Техник Технологи политехник коллеж”-ийн нийт 225 сурагч оролцжээ.
Өдөрлөгөөр ангийн түүхэн замнал, хугацаат цэргийн албаны талаар болон “Эх оронч Монгол-Их сэргэлтийн жил” зорилго, зорилтын талаар ангийн захирагч дэд хурандаа Б.Гантөмөр танилцуулсан юм.
Мөн энэ үеэр сурагчдад урлагийн хэсэгчилсэн тоглолт толилуулж, зэвсэг, хэрэгсэл, хугацаат цэргийн алба хаагчдын хоногийн норм, ахуй хангалт, цэргийн алба хаагчдын хувцас хэрэглэлийн үзэсгэлэн дэлгэн, ангийн байрлал үйл ажиллагаатай танилцуулан, хугацаат цэргийн алба хаагчдын бэлтгэсэн жагсаал, гардан тулааны үзүүлэх тоглолтуудыг сонирхуулан төгсгөлд нь хугацаат цэргийн алба хаагчид болон сургуулиудын дунд олс таталтын нөхөрсөг тэмцээнийг зохион байгуулсан байна.
Нэг өдрийг цэргийн ангийн үйл ажиллагаатай танилцаж өнгөрүүлсэн эмэгтэй сурагчдын төлөөлөл “Эр цэргийн алба хааж буй хөвгүүдээрээ үнэхээр бахархаж байна.” хэмээн сэтгэгдлээ хуваалцсан бол эрэгтэй сурагчдын төлөөлөл “Эх орон биднийг дуудаж байна. Тиймээс бид бэлэн” хэмээн сэтгэл догдлон өгүүлжээ.
Сэтгэгдэл (0)
Сэтгэгдэл бичигдээгүй байна