Кевин Дюрант “Хүмүүс яагаад Стивен Эй Смитийн үгийг сонсоод байдгийг би ойлгохгүй юм. Би энэ лигт 18 дахь жилээ үзэж байна. Энэ хугацаанд түүнийг бэлтгэл дээр юмуу бие халаалт эсвэл видео давталт дээр нэг ч харж байсангүй. Зурагтаар тамирчдын тухай муу муухай үгс унагаж байхыг нь л харснаас биш өөр газар огт хараагүй. Тэр миний хувьд зүгээр л нэг муу “алиалагч”. Тийм л байсан, тэр чигээрээ л байгаа. Үүнийг бичиж болно шүү” хэмээн Кевин Дюрант өгүүлсэн юм.
Яагаад Дюрантыг ингэж бухимдахад хүргэсэн бэ гэвэл First Take шоу нэвтрүүлэгт оролцохдоо түүнийг манлайлагчийн чадваргүй гэж Эй Смит хэлсэн юм.
Тэгвэл Дюрантын энэхүү үгсийг Стивен Эй Смит зүгээр өнгөрсөнгүй. “Би түүн шиг хүмүүст тэгж хүндлэлгүй хандахгүй ээ. Нас ахих тусмаа эмзэг мэдрэмж нь улам бүр дэлгэрч, ухаан санаа нь улам бүр унтарч буй нь харамсалтай. Гэвч өөрийнх нь л асуудал. Сагсанбөмбөгийн хувьд тэр эрдэнэс байсан. Тоглолт нь ч надад таалагддаг. Тиймээс сүүлийн 3 жилийн 2-т нь тохиолдсон шиг плей-оффт нэг ч хожилгүйгээр хожигдохгүй байгаасай даа.
Дюрант худлаа ярихаа больчих хэрэгтэй. Би NBA-д сурвалжлагч, Philadelphia Inquirer-т тоймч байсан. Намайг “Оклахома”-гийн хувцасны өрөөнд харж л байсан. “Голден Стэйт”-д ч мөн адил. Мэдээж, замналынхаа туршид намайг харсаар ирсэн.
Харамсалтай нь одоо би бие халаалт, хувцас солих өрөө рүү тоглолтын дараа орох шаардлагагүй болсон. Яагаад гэвэл сүүлийн 12 жилийн турших хамгийн алдартай шоу нэвтрүүлэг надад байна. Би тоглолтуудыг байнга очиж үздэг ч гэлээ тэндэхийн сурвалжлагч биш болсон. Үүнийг эхлээд ойлгоод авчих.
Намайг тэгж доогуур явж ажилла гэвэл тийм зүйл цаашид тохиолдохгүйг мэдэж ав. Хэрвээ өөрөө яримаар байгаа бол утасны минь дугаар түүнд байгаа. Өөрөө л надтай ярьдаггүй хүн. Тэг чигээрээ байвал тэр л биз” хэмээн Стивен Эй Смит өгүүлжээ.
Сэтгэгдэл (0)
Сэтгэгдэл бичигдээгүй байна