WNBA-гийн улирлын Шилдэг шинэ тоглогчоор нэрлэгдсэн Кейтлин Кларкийг 3х3-ийн лиг Unrivaled эгнээндээ элсүүлэхийн тулд “Месси загварын санал” тавихаар бэлджээ. “Индиана”-гийн од хамгаалагчийг өөрийн болгохын тулд зөвхөн өндөр цалин хангалтгүйг мэдэрч буй учир ийм санал зэхсэн байна.
Месси загварын санал гэдэг нь 2023 онд аргентин довтлогч Лионель Мессиг “Интер Майами” клуб авахдаа байгуулсан гэрээний зарим содон заалтуудыг дагаж дуурайна гэсэн үг. Мессид зөвхөн өндөр цалин амлах нь хангалтгүйг мэдэж байсан учир 150 сая ам.долларын багцтай гэрээ санал болгосон юм. Үүнд клубын хувьцааны хувь болон мөн бусад мөнгөн урамшууллууд багтсанаас гадна Apple компани хүртэл Мэжор лигийн орлогоос хуваалцахаа амлаж байж аваачсан түүхтэй. Өөрөөр хэлбэл, Мессид амласан мөнгөн дүн нь цалингаас гадна 150 сая ам.долларт хүрсэн ч загвар нь шууд худалдан авалт биш байсан.
Үүнтэй адил Кейтлин Кларкийг Дэлхий нийтээр маш их сонирхон ширтэж, шохоорхон харж буйг мэдэрсэн лигийн удирдлага клубын хувьцаа, лигийн орлогын хувийг амлахаар бэлдсэн байна.
Сонирхолтой нь SportsPro-гоос гаргасан судалгаагаар маркетингийн хувьд хамгийн “амттай” тамирчдын жагсаалтын 5-д Месси бичигдсэн бол түүний өмнө буюу 4 –т Кейтлин Кларк жагссан юм байна.
Кларкийг багтаа авснаар Unrivaled лигийн тоглолтуудын тасалбарын борлуулалт нэмэгдэхийн зэрэгцээ мөн TNT Sports телевизийн рейтинг өсөж, үүнийг дагаад найдвартай рекламын эх үүсвэрүүдтэй болно гэж тооцжээ.
Сэтгэгдэл (0)
Сэтгэгдэл бичигдээгүй байна