“Бостон” 132:109-өөр “Никс”-ийг хожихдоо гурваас 29 удаа оновчтой шидэж, лигийн дээд амжилтыг давтлаа. Хэдийгээр дөрөвдүгээр үеийн эхэнд 29 дэх оновчтой шидэлтээ хийсэн ч цаашид 13 удаа гурваас шидэхдээ байгаа оноогүй тул дээд амжилт тогтоож чадсангүй.
Үүнд Деррик Уайт өөрийгөө буруутгасан байна. “Бид ойролцоогоор гурваас 26 удаа амжилттай шидсний дараагаар би NBA-гийн дээд амжилтыг асууж амжсан юм. Хэн нэгэн надад дээд амжилт хэд дээр байгааг хэлж өгсөн. Тэгэхээр нь би багийнхандаа “Дээд амжилтад ганцхан шидэлт дутуу байна шүү” гээд хэлчихсэн юм. Дуугүй л байдаг байж. Тэгж хэлсний дараа л бидний шидэлт болохоо больчихсон. Үүнд би өөрийгөө буруутай гэж бодож байна” хэмээн Уайт өгүүлжээ. Гэхдээ түүний баг хожсон.
Харин хожигдсон “Никс”-ийн Жош Харт өрсөлдөгчдөөсөө допингийн шинжилгээ авах хэрэгтэй хэмээн наргиа хийжээ. “NBA-гийн удирдлага тэдний багийн бүх тоглогчоос допингийн шинжилгээ авах хэрэгтэй. Би өмнө нь хэзээ ч ийм юм харж байсангүй. Ингэж тоглож буй багийг үнэлж хүндлэхээс өөр яахав. Биднийг урж тасдахад бэлэн байлаа. Ордон нь ч үнэхээр янзын уур амьсгал бүрдүүлж чадлаа. Түүнээсээ л цэнэг, эрч хүч авчихгүй юу. “Селтикс”-ийнхэн үнэхээр итгэмээргүй сайн байлаа. Харин бид тоглолтдоо дүн шинжилгээ, гаргалгаа хийх болно” хэмээн Жош Харт өгүүлжээ.
Сэтгэгдэл (0)
Сэтгэгдэл бичигдээгүй байна