ӨӨРИЙГӨӨ ЧӨЛӨӨЛӨХҮЙ

Би өөрийгөө чөлөөлж сурсан. Энэ л хамгийн том ололт байсан. Хичнээн амар болсон гээч. 

Захирал нэртэй атлаа бүх юм руу оролцоод, тэгэхгүй л бол болохгүй санагдаад байдаг байсан. Хүн хичнээн ухаантай ч хэлэхээс наашгүй гэдэг үнэн юм билээ, бизнес эрхлэгчдэд зориулсан сайхан сургалтад суугаад ойлгож авсан, амьдралдаа хэрэгжүүлсэн хамгийн чухал зүйл энэ л байсан.  Сэтгэлгээгээ, сэтгэлээ, өөрийгөө чөлөөлсөн. Хүмүүст заагаад тэд маань хийсэн, одоо муудсан юмгүй л байна. Харин би өөрөө жижиг сажиг зүйлд оролцохоо болиод яаж урагшлах вэ гэж бодох болсон, ингэснээр бизнес маань ч хөгжсөн, дээшилсэн. Энэ бол жижиг дунд бизнес эрхлэгч бүсгүйн яриа.

Тохиолдлоор, завшаанаар ч гэх үү хэд хэдэн жижиг дунд бизнес эрхлэгчидтэй ярилцлага хийхэд тэд өөрийгөө чөлөөлөхгүй аахар шаахар бүх юмыг шалгадаг, цаг хугацаа багатай байхаар “хайрцагт орчихдог", ажилтнууд нь ч хөгждөггүй талаар ярьсан билээ.

Зөвхөн бизнес биш, амьдралд ч тэр, өөрийгөө чөлөөлж сурах хэрэгтэй мэт.

Амьдрал заавартайгаа ирэх биш. Өчигдөр алдсан алдаандаа хэт их гэмшихээс, өөртөө итгэх итгэлээ алдахаас, дандаа л сөрөг зүйлсээр тархиа дүүргэхээс өөрийгөө чөлөөлж сурмаар.. Алдаа бүрээ бодлоо гээд  амрахгүй учир мартаад чөлөөлөөд урагш алхахаас өөр яах билээ.

Таарч нийлэхээ болиод тусдаа амьдрах болсон өмнөх амьдралаасаа, таныг өөр нэгнээр сольж чадсан амрагаасаа, авсан сэтгэлийн шархаа байнга эргэж санахаасаа, хэрвээ чадвал шаналж буй өвчний тухай бодлоосоо ч түр болов өөрийгөө чөлөөлөх хэрэгтэй мэт…

Аз жаргал, зовлон хоёр ээлжилдэг л хорвоо хойно бидний бахархан хардаг олон хүнд ч зовлон зүдгүүр тохиолддог л байж таарна. Тэд ч бас хэрхэхээ мэдэхгүй шаналж, бизнес нь бүтэлгүйтэж, өвчин зовлон, үхэл хагацалтай нүүр тулж зөндөө л зүйл үзсэн байдаг биз. Гэхдээ тэд өөрийгөө чөлөөлж, урагш гишгэж  чадсан байна.

Үхэл хагацал зэрэг том зүйлс биш, өдөр тутмын амьдралын аахар шаахар гэж хэлж болох зүдгүүрүүд л хүнийг илүү их ядраадаг гэж нэгэн алдартан хэлсэн байдаг. Нэг л хэвийн зүйлс байнга давтагдах, тэр л тойрогтоо эргэлдээд гарч чадахаа болихоос ч өөрийгөө чөлөөлөхгүй бол бүх зүйл мухардмал мэт, олон зүйлээс хоцорсон мэт санагдах болно. Тэр зүйлсээ давтан хийх зайлшгүй шаардлагатай байлаа ч өөр сонирхолтой зүйл, сайхан номоор, эерэг шинэ танилууд, дасгал хөдөлгөөн гээд олон зүйлээр амьдралаа илүү баялаг болгоход бага ч болов өөрчлөгдөж байдаг нь ёс. 

Сониуч байх, юмсаас сайныг сайхныг олж харах л амьдралыг илүү учир утгатай болгодог. Хэзээ ч хийж байгаагүй зүйлсийг туршиж үзэх, сэтгэлийн чинь гүнд хадгалаатай байдаг хүсэл мөрөөдөл рүүгээ дөхөх… Хүний амьдрал урт юм шиг атлаа дэндүү богино шүү дээ.

Би өөрийгөө чөлөөлж сурсан. Хичнээн амар болсон гээч... Энэ үг шууд л сэтгэлд туссан учир өөрийгөө чөлөөлөхийг хичээсээр яваа. Та ч бас эргэцүүлээд үзээрэй. Сэтгэлгээгээ өөрчлөх хамгийн хэцүү ч сэтгэлд чинь байгаа хэрэгтэй хэрэггүй ачаагаа хөнгөлөөд өөрийгөө чөлөөлөөрэй.