Нийслэлийн замын Сангийн хөрөнгө оруулалтаар зургаан дүүргийн 17 байршилд 19.5 км замд ээлжит засварыг хийнэ. Тухайлбал, Намъянжугийн гудамж буюу Зүүн дөрвөн замаас Нарантуул зах хүртэлх авто зам, Ботаникийн уулзвараас Улиастайн гүүр хүртэл авто замыг засна. Зам засварын ажил дөрөвдүгээр сарын 10-наас эхэлнэ гэж Нийслэлийн Замын хөгжлийн газрын мэргэжилтэн Б.Ганбат мэдээллээ.
Засварын үед авто замын хучилтын хийцийг хүчитгэх, инженерийн шугам сүлжээний худгуудын түвшнийг тохируулж өндөрлөх, хашлага, явган замын засвар үйлчилгээг хийх, тэмдэг тэмдэглэгээг шинэчлэх юм байна. Мөн чулуун хийцтэй авто замын хашлагуудыг солихгүй, түвшнийг өндөрлөж, замын нүхэн эвдрэлийг засаж, заадас буюу хагарал гагнах, тэмдэг, тэмдэглэгээг сэргээх, гүүрний урсгал засварууд байнга хийгдэх гэнэ.
Авто замын урсгал засварын ажлыг ирэх дөрөвдүгээр сарын 10-наас арваннэгдүгээр сарын 20-ныг хүртэл үргэлжилнэ. 17 байршилд засварлахаар төлөвлөсөн авто замууд нь борооны ус зайлуулах ил болон далд шугамтай бөгөөд засварын үеэр шүүрдэх худгуудын түвшнийг тааруулж, замын гадаргуу дээр тогтсон усыг бүрэн хүлээж авах нөхцөлийг бүрдүүлнэ. Зам засварын ажлыг гүйцэтгэх тендерийг сонгон шалгаруулж, гэрээ хийгдэх ажлууд эхэлжээ.
Сэтгэгдэл (0)
Сэтгэгдэл бичигдээгүй байна