Монгол Улсын дээд шүүхийн нийт шүүгчийн 2026 оны зургаадугаар сарын 22-ны өдрийн хуралдаанаас нэр бүхий 8 намыг Улсын дээд шүүхэд бүртгэлгүйд тооцох шийдвэр гаргажээ.
Тухайлбал Улс төрийн намын тухай хууль /Шинэчилсэн найруулга/-ийг дагаж мөрдөх журмын тухай хуулийн 2 дугаар зүйлд заасан хугацаа буюу 2025 оны 12 дугаар сарын 31-ны дотор намын дүрмээ хуульд нийцүүлэн шинэчлэн бүртгүүлэх өргөдөл ирүүлээгүй Монголын Либерал нам, Монголын эмэгтэйчүүдийн үндэсний нэгдсэн нам, Ард түмний нам, Хамуг Монголын Хөдөлмөрийн нам, Монгол шинэчлэлт нам, ШИНЭ нам, Зүй ёс нам, Ардчилал шинэчлэлийн намыг Улсын дээд шүүхэд бүртгэлгүйд тооцохоор тогтжээ. Эдгээр намын эд хөрөнгө, төлбөр тооцоотой холбоотой бусад асуудлыг Улс төрийн намын тухай хууль болон Иргэний хуулийн дагуу шийдвэрлэхэд энэхүү тогтоол саад болохгүйг мөн дурдсан байна.
Дээд шүүхэд бүртгэлтэй 38 нам байсан бол ийнхүү наймыг нь бүртгэлгүйд тооцжээ.
Хуралдаанаас мөн Монгол Улсын дээд шүүхэд бүртгэлтэй улс төрийн намын жагсаалтыг шинэчлэн батлах болсон байна.
Түүнчлэн Эрх чөлөөг хэрэгжүүлэгч нам (ЭЧХН)-ын оноосон нэрийг “Эрх Чөлөө нам” (ЭЧН) болгон өөрчлөх, үүнтэй холбогдуулан намын дүрэмд оруулсан өөрчлөлтийг бүртгэхээр шийдвэрлэжээ.
Сэтгэгдэл (0)
Сэтгэгдэл бичигдээгүй байна