​НИЙСЛЭЛИЙН 976 БАРИЛГААС 206 НЬ ГАЗАР ХӨДЛӨЛТ ТЭСВЭРТЭЙ ГЭСЭН ДҮГНЭЛТ ГАРСАН

-2024 ОНД ХОРЬ ГАРУЙ УДАА 3.5 МАГНИТУДААС ХҮЧТЭЙ ГАЗАР ХӨДЛӨЛТ БОЛЖЭЭ-

Манай улсын нутаг дэвсгэрт энэ онд 3.5 болон түүнээс дээш магнитудын хүчтэй газар хөдлөлт 20 гаруй удаа болжээ. Улсын хэмжээнд газар хөдлөлт бүртгэх 120 орчим станц байдаг бөгөөд тэдгээр нь хүчтэй газар хөдлөлт болсон газрын мэдээллийг ОБЕГ руу шуурхай боловсруулан илгээдэг байна.

Нийслэлийн 976 барилгад газар хөдлөлтийн тэсвэртэй байдлын үнэлгээ хийхэд ердөө 206 нь тэсвэртэй гэсэн дүгнэлт гарсан байна.

Хөвсгөл аймгийн Ханх сумын нутагт одоогоос 3 жилийн өмнө буюу 2021 оны нэгдүгээр сарын 12-ны өдөр 6.7 магнитудын хүчтэй газар хөдлөлт болж, чичирхийлэл нь орон даяар мэдрэгдсэн. Энэ газар хөдлөлтийн дараа Улсын Онцгой Комиссоос Шинжлэх ухааны академийн одон орон геофизикийн хүрээлэнд хүчтэй газар хөдлөлт болоход ард иргэдэд шуурхай мэдээлж байх үүрэг өгсөн аж. 

Шинжлэх ухааны академийн Одон орон геофизикийн хүрээлэнгээс өчигдөр /2024.03.27/ энэ онд болон өнгөрсөн жилүүдэд болсон зарим газар хөдлөлтийн талаар мэдээлэл өгсөн юм. Тухайлбал, он гарсаар Архангай аймгийн Чулуут Их Тамир орчмоор 3.5-аас дээш магнитудын газар хөдлөлт найман удаа болсон. Хамгийн хүчтэй нь гуравдугаар сарын 3-нд 4.8 магнитудын хүчтэй газар хөдөлжээ. Энэ бүс нутагт идэвхжил 2021 оноос хойш ажиглагдаж байгаа бөгөөд өдөрт дунджаар 10, зарим  өдөр 50-60 удаа жижиг  газар хөдлөлт болох тохиолдол ч гарчээ.

Монгол орны нутаг дэвсгэр Төв Азийн газар хөдлөлтийн идэвхтэй бүсэд орж явдаг. 2024 оны нэгдүгээр сард Японд 7.9 магнитудын газар хөдлөлт болсон бол түүнээс дээш хүчтэй газар хөдлөлт манай оронд 4 удаа болж байсан гэнэ.   

ОБЕГ-аас хүчтэй газар хөдлөлт болж, байшин барилга ганхаж байхад гүйж болохгүй талаар анхааруулсан бөгөөд оршин байгаа газрынхаа аюулгүй цэгийг мэддэг байх хэрэгтэй талаар зөвлөсөн юм. Аюулгүйн цэг гэдэг нь дээрээс унаж байгаа зүйлийг доороос нь тулж, тэгнэн амьд үлдэх боломжтой болгож буй орон зайг хэлдэг. Тухайлбал даацын хана, бат бөх ширээ, ариун цэврийн өрөө зэрэг байж болно.

Газар хөдлөлтийн үед юунд анхаарах талаар нэгдсэн мэдээллийг belenbai.mn цахим хуудаснаас авч болно. Энэ хуудаст гал түймэр, шуурга, зуд гээд бусад гамшгийн үед ч юунд анхаарах талаар мэдээллийг тодорхой тусгасан байна.