УИХ-д суудалтай Иргэний Зориг Ногоон Намын Дүрмийн хорооноос Р.Батболдыг намын гишүүнээс хасах шийдвэр гаргажээ.
Тус нам 2024 оны УИХ-ын сонгуульд сонгогчдоос авсан саналын дүнгээр жагсаалтын эхний 4 нэр дэвшигч УИХ-ын гишүүн болж, парламентад суудалтай улс төрийн 5 хүчний нэг болсон юм. ИЗНН-аас парламентад суугаа 4 гишүүний нэг болох Р.Батболдыг намаас хасах шийдвэр гарснаар цаашид түүнийг эгүүлэн татах уу гэдэг асуудал хөндөгдөж мэдэхээр болоод байна.
ИЗНН мэдээндээ "Намын дотоод ардчилал, хууль дээдлэх зарчмыг хамгаалах хүрээнд Дүрмийн хороо ноцтой зөрчил гаргасан этгээдэд сахилгын шийтгэл оногдуулж, намын гишүүнээс хасах шийдвэр гаргалаа.
Намын Дүрмийн хороо 2026 оны 04 дүгээр сарын 22-ны өдөр хуралдаж, намын гишүүн Р.Батболдод холбогдох асуудлыг хэлэлцэн шийдвэрлэлээ.
Хуралдаанаар Р.Батболд нь:
- Намын дүрмийг ноцтой зөрчсөн
- Намын Их хурлын бүрэн эрхэд халдсан
- Баримт бичгийг хуурамчаар үйлдсэн
- Уг хууль бус, эрх зүйн хүчин төгөлдөр бус баримтыг Монгол Улсын Дээд шүүхэд хүргүүлсэн нөхцөл байдал тогтоогдсон гэж үзэв.
Дээрх үйлдлүүд нь намын үндсэн үнэт зүйлс болох дотоод ардчилал, ил тод байдал, хууль дээдлэх зарчмыг ноцтой зөрчсөн тул Намын дүрмийн холбогдох заалтыг үндэслэн Р.Батболдыг намын гишүүнээс хасах шийдвэр гаргалаа.
Нам нь цаашид хууль бус, дүрэм зөрчсөн аливаа үйлдэлд тууштай, хатуу байр суурь баримталж, дотоод сахилга, хариуцлагыг бэхжүүлэх чиглэлд бүх арга хэмжээг авч ажиллах болно." гэсэн байна.
Сэтгэгдэл (0)
Сэтгэгдэл бичигдээгүй байна