ИЗНН-ын дарга Б.Батбаатар тэргүүтэй тус намынхан хэвлэлийн бага хурал зохион байгуулж, үүсээд буй нөхцөл байдлын талаар мэдээлэл хийлээ.
Намын дарга Б.Батбаатарын хийсэн мэдээллээс зарим зүйлийг онцолвол:
-2016 онд миний бие ИЗНН-д элсэж, УИХ-ын 70 дугаар тойрог дээр тухайн үед нэр дэвшиж өрсөлдөж байсан. Энэ намын гишүүн болоод 10 жил болж байна. 2023 оны есдүгээр сарын 9-ний өдөр хуралдсан намын Их хурлаар даргаар сонгогдсон. 2023 оны 10 дугаар сарын 13-нд Дээд шүүхийн нийт шүүгчийн хуралдаанаас намын даргаар бүртгэж авсан шийдвэр гаргасан. Дээд шүүхийн вэб сайтад намын бүртгэл дотор Батын Батбаатар намын дарга гэсэн бүртгэл байгаа.
-Р.Батболд, Д.Бат-Эрдэнэ, М.Амартунгалаг, С.Батбаатар нарын гишүүд, иргэд зохион байгуулж, гуравдугаар сарын 9-ний өдөр намын Онц их хурлыг хийсэн гэдэг мэдээллийг мэдээллийн хэрэгслээр авсан. Тэрхүү явуулж байгаа дүрмийн бус, хууль бус ажиллагаанд нь манай намын дэд дарга нар, дүүргийн намын дарга нар очиж, “Хууль бус энэ үйл ажиллагаагаа бүү явуул, зогсоох хэрэгтэй. Энгийн гишүүдийг төөрөгдөлд оруулж, ийм зүйл хийх нь буруу” гэдгийг хэлэх гэсэн. Хамгаалалтын алба гаргаад хүмүүсийг оруулж зөв байр суурийг илэрхийлэх боломжийг олгоогүй. Намын дүрэмд Онц их хурал гэж байхгүй.
-Улсын дээд шүүхийн 2026 оны 1 дүгээр сарын 23-ны 10 дугаар тогтоол 2 дугаар сард албажсан. 3 дугаар сарын 2-нд ИЗНН энэхүү тогтоолыг гардаж авсан. Гардаж авснаас хойш Дээд шүүхийн тогтоолд заасан 3 үндэслэлийг засаж, тодруулж, зохих шатны хурлын шийдвэрээр гаргаж, бүртгүүлснээр намын дүрэм эцэслэн бүртгэгдэнэ гэж үзэж байгаа.
-Дээд шүүх ямар нэг байдлаар ИЗНН-ын дүрэм хүчингүй гэж тогтоолдоо дурдаагүй. Дээд шүүхэд бүртгэгдэх хүртэл одоогийн дүрэм үйлчилсээр байгаа.
-2027 оны сонгуульд ИЗНН улс төрийн бусад хүчин, улс төр бизнесийн бүлэглэлийн захиалж байгаа хүнийг намынхаа нэр дээрээс Ерөнхийлөгчид нэр дэвшүүлэхгүй гэдгийг албан ёсоор мэдэгдэж байна. Энэ зүйлийг хэлж эхэлснээс хойш ИЗНН дотор энэ асуудлууд явж эхэлсэн. ИЗНН-ыг бусдын хүүхэлдэйгээр орлуулж, төрийн сонгуульд оролцох улс төрийн ашиг сонирхол байгаа. Гэхдээ энэ нь зүй ёсны буюу улс төрийн зөв тэмцэл, зөв ур чадвар, улс төрийн ур ухаан заасан ажил биш. Хөрөнгө санхүү зарсан, хууль бус, дүрмийн бус, ичих булчирхайгүй хүмүүсийн үйл ажиллагаа болж хувирсан. Энэхүү үйл ажиллагааг гардан зохион байгуулж байгаа хүмүүс нь тодорхой албан тушаал нэхэж байсан. Нэхэж байгаа албан тушаал, илүү дутуу зүйлүүд дээрээ мөнгө олох гэсэн юм аа гэсэн ганцхан шаардлага тавьж байсан.
-ИЗНН-д Тэргүүн дэд дарга С.Батбаатар гэдэг хүн байхгүй.
-Надаас тодорхой албан тушаал нэхсэн С.Батбаатар гэдэг нөхөр төрийн албанд нэг секунд ажиллаж үзээгүй, хуульч гэж өөрийгөө нэрлэдэг, Хуульчдын холбооноос хуульч биш гэсэн тодруулга ирсэн. Яамны газрын даргын албан тушаал нэхсэн. Газрын дарга тодорхой статустай, шалгалт өгөх ёстой. Дээрээс нь яамны газрын дарга, төрийн жинхэнэ албан хаагчийг би халж чадахгүй ээ, халдаг эрх мэдэл нь Төрийн нарийн бичгийн даргад байдаг. Хууль зөрчөөд халлаа гэхэд тэр хүн шүүхэд өгөөд ажилгүй байсан цалин хөлсөө нэхнэ гэсэн. Чи тэнд очиж яах гэж юм бэ гэсэн чинь хөдөө уул уурхай дээр байгаа хэдэн компанийг шалгаад хаачихъя, мөнгө олоод ирье гэсэн.
-ИЗНН 2025 оны гишүүдийн татварын орлого 180 сая, намын санхүүжилт 450 гаруй сая төгрөг орсон. Улс төрийн намын тухай хуулиар намын санхүүгийн асуудалд намын дарга орохыг эрс хориглодог. Тэгэхээр намын зардлын асуудалд Ерөнхий нарийн бичгийн дарга болон санхүүч хариулах нь зүйтэй. Би намын даргын хувьд энэ дээр хариулт өгдөггүй. Яагаад вэ гэхээр намын зардлыг мэдэж гаргадаг хүн нь намын дарга огт биш, хуулиар ингэж үүрэгжүүлсэн байдаг.
-52 хоногийн дотор 2 тэрбум төгрөгөөр зугаалжээ гэсэн байсан. Логикоор бодоход ийм мөнгө ийм хугацаанд зарах боломжгүй. Яамны аудитыг үүнийг шалгаж хяна гэсэн байгаа. Яамны өдөр тутмын гүйлгээ, санхүү хараад үзээд сууж байдаг сайд гэж миний мэдэхээр байхгүй. Салбарын сайд бол ерөнхий төлөвлөгөөг нь баталж өгөхөөс биш, нарийн ширийн гүйлгээ рүү нь ордоггүй. Үүнтэй холбоотой маш олон худал мэдээлэл гарсан. АТГ энэ асуудлыг шалгаад дууссаны дараа хариу нь гарах байх. Хуулийн байгууллага шалгаж байгаа зүйл дээр би юм яриад яах вэ гээд хариуг нь хүлээж байгаа.
-Р.Батболдыг 2010 оны үед надтай хүн танилцуулж байсан. Тэр үед би Чингэлтэй дүүргийн АН-ын даргаар ажиллаж байсан. Үүрийн дарга болгосон, жил хагас болоод алга болсон. Сая 2023 онд Чингэлтэй дүүргийн намын даргын компани дээр цэвэрлэх байгууламж дээр барилга барьж байгаа, тэнд талбайн инженер гээд ажиллаж байсан. Тэгээд эргэж уулзаад ингээд намын үйл ажиллагаанд оролцоод явъя гэсэн. 2023 оны 12 дугаар сарын 9-ний өдрийн хурлаар Р.Батболд намын Ерөнхий нарийн бичгийн дарга болсон. Намаас УИХ-д нэр дэвших үед жагсаалтын 3-т орсон. Энэ асуудлыг С.Батбаатар нь эсэргүүцэж, АТГ-т шалгуулна, намын хяналтын хороонд өгнө гээд баахан явсан. УИХ-д гишүүн болно гэдэг эрхэмлэн явах ёс зүйтэй, тодорхой зүйлээс ангид байх шаардлагатай. УИХ-ын кнопоо юунд хэрэглэж байна вэ гэдгээс нь л улс төрийн асуудал үүснэ ш дээ. Аваад л сонгуульд орчихсон. Сонгуулийн үеэр намын санхүүжилт, үйл ажиллагаанд нэмэр болоогүй ийм л нөхөр. Нэгэнт эхэлчихсэн сонгууль учраас үг хэлэх арга байгаагүй. Өнөөдрийг хүртэл тодорхой хуулийн төсөл санаачлаагүй. 2024 оны 7 дугаар сард тангараг өргөснөөс хойш зүгээр санхүүжилтийн хувьд хандивласан дүнг нь хэлвэл 5 сая төгрөг хандивласан. Сонгуульд нэг ч төгрөг зараагүй.
-ИЗНН-ын гишүүд сонгуульд мөнгө зарж гишүүн болоогүй ш дээ. М.Нарантуяа- Нара гишүүн 120.5 сая төгрөгийн хандив өргөсөн. Сонгуулийн хуулиар энэ нь зөвшөөрөгддөг. Нөгөө гишүүд нь ИЗНН-ын энэ үзэл санааг 26 жилийн турш тээж явсан гишүүдийн бий болгосон суурь, тухайн сонгуулийн зөв менежмент энэ бүх зүйл дээр үндэслэж гишүүн болсон хүмүүс.
-ИЗНН засагт хамтарснаар миний ах, дүү нараас нэг ч хүн албан тушаалд очоогүй шүү.
-Манай намын гишүүд улс төрийн хувьд голын нөгөө эрэг дээр, захиалагчийнхаа талд орлоо. Захиалагчийнхаа хамт зам мөрөө бодсон нь дээр гэж зөвлөх байна.
Сэтгэгдэл (1)