Монгол Улсын Төрийн шагналт яруу найрагч Ринчиний Чойном 1936 оны 2-р сарын 10-ны өдөр Хэнтий аймгийн Дархан сумын нутагт төрсөн. Өнөөдөр Р.Чойномын мэндэлсний 90 жилийн ой тохиож байна.
Ард түмнийхээ сэтгэлд олон сайхан шүлэг, найраглалаараа мөнхөрсөн авьяас билэгт яруу найрагч Р.Чойном 1970 онд 34 нас хүрсэн өдрөө энэхүү шүлгийг бичсэн байдаг юм.
ТӨРСӨН ӨДРИЙН ШҮЛЭГ
Сэргэлэн цовоо явахад хад чулуу хүртэл дуулна
Сэтгэл эмзэглэх үед гитар хүртэл уйлна
Өнгөтэй өөдтэй явахад бусдын эхнэр ч дагана
Өвдөж зовохын цагт бурхан хүртэл зугтаана
Ахархан жаргалаа хүмүүс ч зуун жил гэж эндүүрдгээс
Амьдралын хэдэн жилд зунаасаа намар нь элбэг
Өргөл ихтэй хорвоог хүн найрын ширээ шиг андуурдгаас
Өөрт нь оногдох цөөн жилд намраасаа өвөл нь элбэг
Бараан толбыг нь бодоод байвал
Энэ орчлон таг харанхуй
Баяр зугаагий нь дагаад байвал
Эргэн тойрон дандаа зун!
Мөнхийн зунаар нь цэнгэх гэвэл
Мөнгө болоод ухаан хэрэгтэй
Мөстэй өвөлд нь дааръя гэвэл
Мөрөөрөө шударга явах хэрэгтэй
Ялзрал ихтэй хорвоогийн
Явдал паянг нь тунгааж бичсэн нь
Яруу найрагчийн түүхэнд
ганцхан би бишээ.
Тэр бүхнийг мэдсээр байж
Тэргэн дугуйд нь хэрчүүлэгч
Тэсгэлгүй шүлэгчийн тоонд
Би бас ганцаар биш!
1970-02-10
Р.Чойном
Засгийн газрын хуралдаанаас Монгол Улсын төрийн шагналт, яруу найрагч Ринчиний Чойномын мэндэлсний 90 жилийн ойг тэмдэглэх тогтоол гарсан бөгөөд Ажлын хэсэг байгуулж, төлөвлөгөө батлан хэрэгжүүлэхийг Соёл, спорт, аялал жуулчлал, залуучуудын сайд Ч.Ундрамд даалгасан юм.
Р.Чойномын "Өд" сангаас мэндэлсний 90 жилийн ойн өдөрт нь зориулан "Залуу нас" сонинг эрхлэн гаргасан байна.
Сэтгэгдэл (0)
Сэтгэгдэл бичигдээгүй байна