Эрүүл мэндийн сайд Ж.Чинбүрэн Бүгд Найрамдах Солонгос Улсад 2026 оны 1 дүгээр сарын 28-30-ны өдрүүдэд ажлын айлчлалынхаа хүрээнд БНСУ-ын Эрүүл мэнд, халамжийн Дэд сайд Ли Хюүн Хуунтай албан уулзалт өчигдөр /2026.01.29/ хийж, цаашдын хамтын ажиллагааны талаар санал солилцжээ.
Хоёр улсын эрүүл мэндийн салбарын хамтын ажиллагааны чиглэлийг тодорхойлон, жил бүр болдог байсан яамд хоорондын Зөвлөлдөх уулзалтыг сэргээж, БНСУ-ын Сөүл хотод 2026 оны гуравдугаар сард зохион байгуулахаар болсон банйа.
Мөн БНСУ-д эмнэлгийн тусламж, үйлчилгээ авч буй иргэдэд дэмжлэг үзүүлэх зэрэг чухал сэдвүүдийн хүрээнд санал солилцож, тодорхой ажлуудыг хэрэгжүүлэхээр тохиролцжээ.
Уулзалтын үеэр хэлэлцсэн чухал асуудлын нэг нь Монгол Улсаас Бүгд Найрамдах Солонгос Улсад эмнэлгийн тусламж, үйлчилгээ авах иргэдийн тоо нэмэгдэж байгаатай холбогдуулан талууд хамтын ажиллагааны уялдаа холбоог сайжруулах чиглэлд анхаарал хандуулан ажиллахаар болсон байна.
Монголын эмч, эмнэлгийн мэргэжилтнүүдийг богино, дунд, урт хугацааны сургалтад БНСУ-д хамруулах, чанарын шаардлага хангасан эм, эмнэлгийн хэрэгслийг нийлүүлэх зэргээр хамтын ажиллагааг өргөжүүлэх талаар ярилцжээ.
Эрүүл мэндийн сайд ажлын айлчлалын хүрээнд БНСУ-ын Эрүүл мэндийн даатгалын үндэсний газар болон Эрүүл мэндийн даатгалын нэхэмжлэлийн хяналтын газарт тус тус ажиллана.
Сэтгэгдэл (0)
Сэтгэгдэл бичигдээгүй байна