Хууль зүй, дотоод хэргийн сайд Б.Энхбаяр тэргүүтэй Монгол Улсын Засгийн газрын төлөөлөгчид Нидерландын Хаант улсын Гааг хотноо 2025 оны 12 дугаар сарын 1--5-ны өдрүүдэд болсон Олон Улсын Эрүүгийн шүүхийн Ромын дүрмийн Оролцогч талуудын Ассамблейн 24 дүгээр чуулганд оролцох үеэр ОУЭШ-ийн Ерөнхийлөгч, шүүгч Томоко Аканэтэй уулзжээ.
Уулзалтын үеэр Хууль зүй, дотоод хэргийн сайд Б.Энхбаяр Монгол Улс Олон улсын Эрүүгийн шүүхийн Ромын дүрмийг соёрхон баталсан Азийн цөөн орны нэгийн хувьд цаашид Ромын дүрмийг бүс нутгийн хэмжээнд сурталчлан таниулах, түгээн дэлгэрүүлэх чиглэлээр ОУЭШ-ийн үйл ажиллагааг дэмжиж ажиллахаа илэрхийлсэн байна.
Түүнчлэн Монгол Улсаас анх удаа Олон улсын Эрүүгийн шүүхэд шүүгч Д.Эрдэнэбалсүрэн сонгогдон ажиллаж байгаа нь манай улсын хувьд түүхэн ач холбогдолтойгоос гадна олон улсын хамтын нйигэмлэгийн зүгээс манай улсад хүлээлгэж буй өндөр хариуцлага, итгэл найдвар болохыг онцлон тэмдэглэжээ.
Олон Улсын Эрүүгийн шүүхийн Ерөнхийлөгч, шүүгч Томоко Аканэ Монгол Улс өөрийн шүүгчээ ОУЭШ-д ажиллуулж байгаа нь шүүхийн үйл ажиллагааг дэмжиж байгаагийн тод илрэл болж байгааг онцлон дурдаад Монгол Улсынхуулийн байгууллагаас ОУЭШ-тэй байгуулсан гэрээ, хэлэлцээрийн хүрээнд цаашид өргөн хүрээнд хамтран ажиллахаа илэрхийлсэн байна.
Ташрамд дурдахад АНУ-ын Нью-Йорк хотноо 2023 оны 12 дугаар сард болсон Ромын дүрэмд оролцогч талуудын Ассамблейн 22 дугаар чуулганы хуралдаанаас Монгол Улсын дээд шүүхийн шүүгч Дамдины Эрдэнэбалсүрэн эхний санал хураалтаар ганцаараа 114 орноос 81-ынх нь саналыг авч сонгогдон 2024 оноос эхлэн Олон Улсын Эрүүгийн шүүхийн шүүгчээр ажиллаж байгаа юм.
Олон улсын эрүүгийн шүүхийн дүрмийн 14 дэх заалт, Дотоод журмын 4 дэх заалтуудад зааснаар Танхимын Ерөнхийлөгчийг шүүгчдийн олонхийн саналаар сонгодог бөгөөд тус шүүхийн хүрээнд гаргасан шийдвэр, өргөдөл, гомдлыг хянан шийдвэрлэдэг, хамгийн шилдэг, туршлагатай шүүгч нараас бүрдсэн дээд шатны танхим болох ОУЭШ-ийн давж заалдах шатны танхимын шүүгчид санал нэгтэйгээр Д.Эрдэнэбалсүрэнг тус танхимын Ерөнхийлөгчөөр өнгөрсөн оны 3 дугаар сард сонгосон билээ.
Сэтгэгдэл (0)
Сэтгэгдэл бичигдээгүй байна