Ж.МИШЭЭЛД 112241 ХҮН САНАЛ ӨГЧ, ШҮҮГЧДИЙН Ч, ҮЗЭГЧДИЙН Ч САНАЛААР ТЭРГҮҮЛЖ, ЯЛАЛТ БАЙГУУЛЖЭЭ

-МИШЭЭЛ КАЗАХ ҮЗЭГЧДЭДЭЭ ЗОРИУЛЖ ЭХ ХЭЛ НЬ ДУУ ГАРГАНА- 

Silk Way Star олон улсын уралдааны финалын шатны шалгаруулалтын үеэр дэлхийн өнцөг булан бүрээс 508,287 үзэгч саналаа өгснөөс Ж.Мишээл 112,241 саналаар тэргүүлжээ.  

Ийнхүү манай авьяаслаг, үзэсгэлэнт дуучин Ж.Мишээл хоолойных нь гайхалтай ур чадварыг тодотгосон уртын болон орчин үеийн дууны хэв маягийг хослуулсан "Монгол" дууны гайхалтай үзүүлбэрээрээ шүүгчдийн оноо, үзэгчдийн санал хураалтын аль алинд нь тэргүүлж, Silk Way Star-ын ялагч болсон байна.  

Хэвлэлийн бага хурлын үеэр Ж.Мишээл казах хэлээр дуу бичихээр төлөвлөж буйгаа зарлажээ. "Би казах  соёлд үнэхээр хайртай. Хэл нь маш гоё санагддаг, сурмаар байгаа. Казах үзэгчдэдээ зориулж казах хэлээр дуу гаргахаар шийдсэн." гэж тэр хэлсэн байна. 

Jibek Joly телевизийн удирдах захирал Еркежан Кунтуган үзэгчдийн санал хураалтын дүнг зарласан бөгөөд бусад оролцогчдын хувьд Узбекистан 85 443, БНХАУ 73 662, Малайз 73 609, Армени 73 160, Гүрж 46 027, Казахстан 32 145 санал тус тус авсан байна. 

Ийнхүү дэлхийн өнцөг булан бүрээс янз бүрийн улс орнуудын нийт 508,287 үзэгч санал хураалтад оролцсон нь бүс нутагтаа дууны телевизийн төсөлд бүртгэгдсэн хамгийн өндөр тоо баримтуудын нэг болж, тус шоу олон орны үзэгчдийн сонирхлыг ихээхэн татсаныг харуулж байгаа хэрэг юм.