ХАЖУУ ТИЙШЭЭ ХАРЖ ХЭВТЭН УТАС ҮЗСЭНЭЭС ШАЛТГААЛЖ НҮДНИЙ ХАРААГАА ТҮР АЛДЖЭЭ

Хятадын Жанжиажэ хотын 24 настай залуугийн нүд түр хугацаанд юм харахаа байжээ. Эмч нарын үзэж байгаагаар  нүдний хугарлын гажиг буюу миопигоос шалтгаалан нүдэнд өөрчлөлт орсноор хараа алдахад хүрсэн гэж Sohu мэдээлсэн байна. 

Залуу оюутан үедээ хажуу тийшээ харж хэвтэж байхдаа утсаа байнга ашигладаг байж. Үүнээс шалтгаалан түүний баруун нүдэнд нь зүүн нүднээсээ 300 диоптр их буюу 600 диоптр миопи үүссэн байна. 

Ухаалаг гар утсыг ашиглаж байхдаа хажуу тийшээ харж хэвтэх нь нүдний цусны судсуудад даралт учруулж, урсгалыг нь алдагдуулж, улмаар түр зуурын “давхар хараа” үүсгэдэг болохыг эмч нар тэмдэглэжээ. Нэмэлт эрсдэлт хүчин зүйл нь нүдний хоорондох ачаалал байнга ялгаатай байснаар нүд ядрах, хараа муудахад хүргэдэг байна.

Мэргэжилтнүүд ийм эрсдэлд орохгүйн тулд хэвтэж байхдаа, ялангуяа хажуу тийшээ, дээшээ харж хэвтэхдээ ухаалаг утас ашиглахаас зайлсхийхийг зөвлөжээ. Санамсаргүй байдлаар нүүрэн дээрээ утсаа унагах нь нүдний гэмтэл, тэр дундаа нүдний торлог бүрхэвч урагдах, гэмтэх шалтгаан болдог бөгөөд энэ нь миопи өндөртэй хүмүүст онцгой эрсдэлтэй байдаг аж. Утас ашиглахдаа толгой, биеэ тэгш байлган сууж, нуруугаараа бөхийж, хүзүүндээ ачаалал авахгүй байхыг ч зөвлөж байна.

Харанхуйд ухаалаг гар утас ашиглах нь аюултай, дэлгэц хэт их тод харагдаж, нүдний ядаргааг нэмэгдүүлдэг. Гэрэлтүүлгийг багасгаж, шөнийн горимыг идэвхжүүлэх, үсгийн хэмжээг нэмэгдүүлэх нь хамгийн сайн арга гэж зөвлөсөн байна. Оройд ер нь утасны хэрэглээг 60-90 минутаар хязгаарлах ёстой,  удаан хугацаагаар утас ашиглах нь мэдрэлийн системийг өдөөж, унтахад сөргөөр нөлөөлдөг.

Утаснаас шалтгаалж нүдээ эрсдэлд оруулахгүйн тулд хангалттай амрах, унтахынхаа өмнө удаан хугацаагаар ашиглахаас зайлсхийх хэрэгтэйг онцолжээ.

Өмнө нь Sohu  унтахынхаа өмнө утас хэрэглэснээр эрүүл мэндэд учирч болох эрсдэлийн талаар мэдээлж, уг зуршил нь олон тооны өвчинд хүргэдэг хэмээн сэрэмжлүүлж байсан юм. Унтахаасаа нэг цаг хагасын өмнөөс эхлэн утас хэрэглэхгүй байх нь бие махбодид дааврын түвшинг зохицуулж, мелатонин ялгаралтыг хэвийн болгож, сайхан нойрсоход тусалдаг гэж мэргэжилтнүүд хэлж байна.