УТАСНЫ ДЭЛГЭЦИЙН ГЭРЭЛ ЭСИЙН ХӨГШРӨЛТИЙГ ХУРДАСГАДАГ

Шөнө унтахынхаа өмнө гар утас “ширтэх” нь эрүүл мэндэд ч, нойронд ч сөргөөр нөлөөлдөг.

Испанийн эрдэмтдийн хийсэн судалгаагаар шөнийн цагт утасны гэрэлд өртөх нь бамбай булчирхайн хорт хавдар тусах эрсдэлд хүргэж болно гэжээ. 12.8 жилийн хугацаанд 460 мянган хүнийг хамруулсан энэхүү судалгаагаар шөнийн цагаар гар утас хамгийн их ашигласан хүмүүс хамгийн бага гар утасны туяанд өртсөнтэй харьцуулахад бамбай булчирхайн хорт хавдар тусах эрсдэл 55 хувиар их байгааг тогтоосон байна. Ялангуяа эмэгтэйчүүдийн хувьд энэ нь түлхүү байжээ.  

Эрдэмтэд бамбай булчирхайн дааврын ялгаралд утасны цэнхэр гэрлийн нөлөөлөлтэй энэ нь холбоотой байж магадгүй гэж үзэж байна. Үүнийг баталгаажуулах шаардлагатай хэвээр байгаа юм.

Бээжингийн Андин эмнэлгийн сэтгэцийн эмгэг судлалын тасгийн ахлах эмч Лю Жин унтахын өмнө утасны дэлгэцэн дээр аливаа зүйлийг унших нь сэргэг байдлыг нэмэгдүүлдэг гэж тэмдэглэжээ. Судалгаагаар дэлгэцийг хоёр цагаас илүү хугацаагаар ашиглах нь мелатонины ялгаралтыг 22 хувиар дарангуйлж, нойрсох цагийг хойшлуулдаг. Цаашилбал, дэлгэцийн гэрэл нарны гэрлээс илүү хүчтэй бөгөөд байнга хэрэглэх нь эсийн хөгшрөлтийг хурдасгадаг байна.

Унтахын өмнө утасны дэлгэц ширтэх нь нойрны чанарт сөргөөр нөлөөлдөг болохыг судалгаагаар тогтоожээ. Норвегийн Нийгмийн эрүүл мэндийн хүрээлэнгээс хийсэн 18-28 насны 45 мянган хүнийг хамруулсан судалгаагаар унтахын өмнө нэг цаг утас хэрэглэхэд  нойргүйдэх эрсдэлийг 59 хувиар нэмэгдүүлж, унтах хугацааг 24 минутаар бууруулдаг болохыг тогтоосон байна.

Гар утсыг ялангуяа хэвтэх үедээ байнга хэрэглэх нь нүд, хүзүүний ачаалал ихсэхэд хүргэдэг. Дэлгэцийг ойроос харах нь цилиар булчинг сулруулдаг. Энэ нь нүдний ядаргаа, бүдэг хараа зэрэг шинж тэмдгүүдийг үүсгэдэг.

Хүзүүний буруу байрлал нь мурийлт гажиг үүсэхэд нөлөөлдөг. Шөнийн цагаар утас хэрэглэснээр хоолны дуршил нэмэгдэж, илчлэг ихтэй хоолонд дурлахаас гадна адреналин, допаминыг өдөөж, сэтгэлийн хөөрлийг нэмэгдүүлж, илүү орой унтахад хүргэн, бат бөх нойрсоход сөрөг нөлөө үзүүлдэг. Мөн шөнийн цагаар утас хэрэглэх үед нүдний даралт ихсэх эрсдэлтэйг анхааруулжээ. Харанхуйд утсаа ашигласнаар хүүхэн хараа томорч, нулимс цийлэгнэлтийг бууруулдаг болохыг тэмдэглэсэн байна.  Тод гэрэл нь мелатонин ялгарахад нөлөөлж, нойрны чанар муудаж, нойргүйдэлд хүргэдэг.

Мэргэжилтнүүд унтахаасаа нэг цаг хагасын өмнө утас хэрэглэхээ зогсоохыг хамгийн үр дүнтэй арга гэж зөвлөж байна. Ингэснээр бие махбодид дааврын түвшинг зохицуулах, мелатонин ялгарах, сайн унтахад тусална гэжээ.