Харанга хамтлагийн ахлагч, Монгол Улсын төрийн шагналт, гавьяат жүжигчин Цэндсүрэнгийн Энхманлай тэнгэрт дэвшжээ.
Ц.Энхманлай 1974 онд анх уран бүтээлийн замналаа эхэлж Ногоон гэрэл хамтлагт гитарчнаар орж, 1977-78 онд Айзам хамтлагт бөмбөрчнөөр тоглож байв. 1978 онд цэрэгт татагдаж Соёмбо хамтлагт орж 1986 он хүртэл хүчин зүтгэх үедээ Ц.Чулуунбат, Н.Пүрэвдаш, Х.Лхагвасүрэн нартай танилцсан байна. 1986 онд циркэд гитарчнаар орж "Цирк Эстрад" хамтлагийг байгуулсан байдаг.
Я.Одсүрэнтэй Ногоон гэрэл хамтлагт тоглодог байхаасаа тэрээр хүнд рок хамтлаг байгуулахыг хүсэж явснаа 1989 онд биелүүлж, Ц. Чулуунбат, Н. Пүрэвдаш, Я. Одсүрэн, Х.Лхагвасүрэн нартай хамтран Харанга хамтлагийг байгуулсан юм. Харанга хамтлагийн анхны тоглолтын нэр түүний үг, аяыг нь зохиосон "Амьдрал" дууны нэрээр нэрлэгдсэн.
Гишүүн бүр нь од болж гялалзсан хамтлаг байгуулахыг хүсдэг байснаа биелүүлж, Монголын рок попын түүхэнд Харанга хамтлаг домог болон ард түмний хайр хүндэтгэлийг хүлээж, олон сайхан бүтээлээрээ үзэгчдийн сэтгэлийг татаж, зүй ёсоор хүлээн зөвшөөрөгдсөн юм. Ц.Энхманлай рок хамтлаг монгол хүний араншинтай зохицдог гэж хэлсэн байдаг.
Сэтгэгдэл (1)