“Гэрэл зургийн долоо хоног” цогц арга хэмжээ “Монголын түүх гэрэл зурагт” уриан дор өнөөдрөөс /2025.04.21/ дөрөвдүгээр сарын 27-ныг хүртэл долоо хоногийн хугацаанд түүх, байгаль, орчин үе сэдвээр улсын хэмжээнд явагдана.
Өнөөдөр нээлтээ хийсэн тус арга хэмжээний “Гэрэл зураг түүхийн судалгаа болох нь” анхны өдрийн өдөрлөгийн хүрээнд Соёлын гавьяат зүтгэлтэн, фото сэтгүүлч С.Цацралтын “Монголын анхны гэрэл зургийн он цагийг шинэчлэн тогтоох нь” сэдвээр илтгэл тавилаа. С.Цацралт монголчууд анх 1845 онд гэрэл зурагт дүр төрхөө буулгаж, гэрэл зургийн түүхээ эхлүүлснээс өдгөө 180 жил болж буйг Монгол нутагт гэрэл зураг авсан түүхэн баримт, тухайн зураг, хэвлэгдсэн ном бүтээлийг судлан тогтоосноо олон нийтэд танилцууллаа. Үүний урьд Монголын анхны гэрэл зургийг 1874 оноор авч үздэг байсан бол даруй 29 жилээр урагшлуулсан онцлох үйл явдал болсон юм.
Дэлхийд 1830-аад оны дунд үед гэрэл зураг үүсэж хөгжсөнөөс хойш тун удалгүй монголчууд гэрэл зурагт анх дүрсээ үлдээсэн түүхэн баримтын он цагийг тодруулсан нь онцлог байв.
Мөн түүхийн ухааны доктор На.Батболд “Маршал Чойбалсангийн түүхэн гэрэл зургуудын тухай” илтгэлдээ “Х.Чойбалсан нь төр засаг, цэрэг дайны үйл ажиллагаа болоод аж монгол ахуй соёл, өөрийн аж амьдралын талаарх зургуудыг авахуулж үлдээсэн, өөрөө ч гэрэл зураг авдаг байсан нь Монголын түүх, соёлын өвд үнэтэй хувь нэмэр оруулсан, Монголын гэрэл зургийн хамгийн арвин баялаг сантай хүн юм” хэмээн түүний гэрэл зургуудыг шинжлэн тодорхойлсон нь манай гэрэл зургийн түүхийн судалгаанд үнэ цэнтэй судалгаа болжээ.
Гэрэл зураг гэдэг “Хамааралгүй салбар үгүй хязгааргүй ертөнц юм” хэмээн Монголын гэрэл зурагчид тодорхойлсон бөгөөд улс орны түүх, урлаг соёлын бүтээл, ховор нандин өв, судалгаа шинжилгээний үнэт зүйл болохыг олон нийтэд хүргэх, танин мэдүүлэхийг зорьсон долоо хоногийн арга хэмжээ өдөр бүр өөр, өөр мэдээлэл, сэдвээр явагдана.
Долоо хоног уг арга хэмжээний үндсэн үзэсгэлэн болох “Монголын түүх гэрэл зурагт”, “Монголын сайхан орон”, “Гэрлээр зурсан сэтгэлгээ” үзэсгэлэнгүүд Монголын уран зургийн галерейд, баримтат гэрэл зургийн “Өв” үзэсгэлэн “Улаан гэр” галерейд, "Монголын байгалийн шилдэг гэрэл зураг-2024" олон улсын уралдааны шилдэг бүтээлийн үзэсгэлэн Байгалийн түүхийн музейд, “Нарт тэнгэрийн орон” гэрэл зургийн үзэсгэлэн Монголын театрын музейд, “Тал нутгаас тавхай чинээ” гэрэл зургийн үзэсгэлэн “Уран зургийн галерей”-д гарч байна.
Мөн улсын хэмжээнд 21 аймгийн орон нутгийн музей, галерейд бэсрэг үзэсгэлэн, арга хэмжээнүүд явагдаж байгаа юм.
Гэрэл зургийн өдрүүдийн хөтөлбөрт арга хэмжээг тодруулбал: “Монголын түүх гэрэл зурагт”, “Go Mongolia Day”, “Хэвлэлийн гэрэл зураг”, “Баримтат гэрэл зураг, гэрэл зураг сонирхогчид”, “Залуу гэрэл зурагчин уран бүтээлчид”, “Төсөл, хөтөлбөр хэрэгжүүлж буй зурагчид”-ын өдөрлөгүүдийг тус тус зохион байгуулж, мэдээлэл, танилцуулга, ярилцлага, сургалт, сурталчилгаа, эрдэм шинжилгээ, судалгааны илтгэл, хэлэлцүүлгүүдийг явуулна.
Сэтгэгдэл (0)
Сэтгэгдэл бичигдээгүй байна