Улсын драмын эрдмийн театрын хамт олон Б.Цогнэмэхийн зохиол, Төрийн соёрхолт, Урлагийн гавьяат зүтгэлтэн, найруулагч Н.Наранбаатарын найруулга “Тэнгэрийн хүү” түүхэн туульсын жүжгээрээ 12 дах удаагийн МИТЕМ олон улсын театрын наадмын нээлтийн жүжгээр оролцохоор 76 хүний бүрэлдэхүүнтэй Унгар улсын нийслэл Будапешт хотыг зорино.
Энэ бол Монгол Улсын театрын урлагийн хөгжлийг нэг шат ахиулж буй онцгой үйл явдал төдийгүй Монгол Улсын Засгийн газраас хэрэгжүүлж буй “GoMongolia” үндэсний брэндийн хүрээнд үндэсний соёл, өв уламжлалаа олон улсад сурталчлан таниулах гайхалтай боломж юм.
Монголын төрт ёсны эх суурь болсон Хүннү гүрний Модун шаньюйн түүхийг өгүүлсэн, үндэсний ухамсар, язгуур соёл, нүүдэлчдийн гүн ухаан, эх оронч үзлийг урлагийн хэлээр дэлхийн үзэгчдэд хүргэх чухал бүтээл болох "Тэнгэрийн хүү" жүжиг 2025 оны дөрөвдүгээр сарын 25-26-нд Унгарын Будапешт хотноо Үндэсний театрын тайзнаа тоглогдоно.
2025 онд Монгол, Унгар хоёр улс дипломат харилцаа тогтоосны 75 жилийн ой болж байгаа юм.
Сэтгэгдэл (0)
Сэтгэгдэл бичигдээгүй байна