Төрийн цахим үйлчилгээний зохицуулалтын газраас мэдээллийн технологийн чиглэлээр суралцах сонирхолтой хүүхдүүдийг дэмжих, цахим ур чадварыг сайжруулах зорилготойгоор “ХУРДАН” клубийг нээсэн бөгөөд өнөөдрийн байдлаар улс даяар 1500 гаруй сурагчийг эгнээндээ нэгтгээд байна
“ХУРДАН” клубээр дамжуулан хүүхэд залуусын цахим зөв хэрэглээ, технологийн дэвшлийн талаарх ойлголтыг нэмэгдүүлж, тэдний идэвх оролцоонд тулгуурлан нийгэмд нөлөөлөх, ирээдүйн мэргэжлээ сонгоход нь дэмжлэг үзүүлэхээс гадна мэдээллийн технологийн чиглэлээр гадаад, дотоодын төсөл хөтөлбөрт хамрагдах боломж нээгдэж байгаа юм.
Тус клубын гишүүд өсвөр үеийнхний бүтээлч сэтгэлгээ, мэдээллийн технологийн чадвар аймаг, орон нутгийнхаа хөгжилд хувь нэмэр оруулж эхэлж байна.
Тухайлбал, Өмнөговь аймгийн "ХУРДАН" клубийн сурагчид Даланзадгад хотын хамгийн их зорчигч үйлчлүүлдэг дөрвөн автобусны чиглэлд байршил тогтоогч төхөөрөмж суурилуулсан бөгөөд одоо иргэд QR кодыг уншуулан тухайн автобус хаана явж байгааг бодитоор харах боломжтой болжээ.
Энэхүү санаачилгыг “Даланзадгад зорчигч тээвэр” ОНӨААТҮГ-ын хамт олон дэмжиж, аппликэйшн боловсруулах, интернэт суурилуулах зэргээр хамтран ажиллахаа илэрхийлсэн байна.
Дашрамд дурдахад хамгийн сүүлд Сэлэнгэ аймгийн Засаг даргын дэргэдэх өсвөрийн "ХУРДАН" клубийн нээлтийн үйл ажиллагаа 2025 оны гуравдугаар сарын 11-ний өдөр болжээ.
Сэтгэгдэл (0)
Сэтгэгдэл бичигдээгүй байна