“Монгол” нүүдэлчин өвлийн фестивалийг Үндэсний цэцэрлэгт хүрээлэнд энэ сарын 16-наас эхлэн зохион байгуулсан бөгөөд маргааш /2025.02.22/ хаалтын ажиллагаагаа хийнэ.
Фестивалийг монголын соёлын биет бус өвөөс өвлийн улиралд хамаарах зан үйлийг сурталчлан таниулах, дэлхийд нэн ховордож буй Монголын бахархалт амьтан болох Мазаалай баавгайг хамгаалах зорилгоор өвлийн цас, мөсний баяртай хамтатгасанаараа онцлог юм.
Монголын шилдэг мөсөн сийлбэр урлаачид фестивалийн хүрээнд Үндэсний цэцэрлэгт хүрээлэнд “Мазаалай” мөсөн хотхоныг байгуулсан. Манай шилдэг 100 гаруй уран бүтээлчид хамтран 60 гаруй мөсөн сийлбэрүүдийг нэг ар гаруй хугацаанд урлаж фестивальд улам өнгө нэмсэн юм. Энэхүү бүтээлүүд нь улаан номд орсон Мазаалай баавгайг хайрлан хамгаалахад чиглэсэн үндсэн сэдвийн дор өвлийн өнгийг илүү тодотгосон мөсөн сийлбэр гэдгээрээ онцлог юм.
Олон улсын томоохон уралдаануудад гран при болон шагналт байруудад шалгарч амжилт гаргаж буй уран сийлбэрч СТА Ц.Батмөнх, уран сийлбэрч СТА Д.Мөнхтуулаар ахлуулсан мөсөн сийлбэрийн багийн бүх хамт олон, уран бүтээлчдийн хөдөлмөр, сэтгэлээс төрсөн энэхүү гайхамшигтай бүтээлүүд нь өвлийн өнгийг тодотгох өвөрмөц бүтээлүүд болсон байна.
Фестивалийн онцлох үйл явдлын нэг болох “Хурд” хамтлагийн тоглолт 2-р сарын 22-ны 13 цагаас “Мазаалай” төв тайзнаа болно. Монголын рок, поп урлагийн амьд домог болсон, Төрийн соёрхолт “Хурд” хамтлаг өвлийн фестивалийн сүүлийн өдрийг уран бүтээлээрээ чимж, мөсөн тайзнаа үнэ төлбөргүй тоглох юм.
Сэтгэгдэл (0)
Сэтгэгдэл бичигдээгүй байна