"МОНГОЛ" НҮҮДЭЛЧИН ӨВЛИЙН ФЕСТИВАЛЬ БОЛНО

“МОНГОЛ” нүүдэлчин өвлийн фестивалийг 2025 оны хоёрдугаар сарын 16-наас 22-ны өдрүүд Үндэсний цэцэрлэгт хүрээлэнд анх удаагаа зохион байгуулах гэж байна.

Нүүдэлчин Монголчуудын эртнээс нааш тэмдэглэж ирсэн үндэсний сар шинийн баярыг угтан тус фестивалийг Соёлын биет бус өвийн долоон ай савын өвлийн улиралд хамаарах зан үйлийг сурталчлан таниулах, дэлхийд нэн ховордож буй бахархалт амьтан болох Мазаалай баавгайг хамгаалах зорилготой өвлийн цас мөсний наадамтай хамтатган зохион байгуулж байгаагаараа онцлог аж. 

Фестивалийн үеэр “Мазаалай” Олон улсын цас мөсний наадмын шилдэг 28 оролцогчдын мөсөн сийлбэрийн үзэсгэлэнг олон нийтэд нээлттэй танилцуулна. 

Мөн үндэсний сар шинийн баярын уламжлал, онцлог, идээ ундаа, хувцас хэрэглэл, нүүдлийн ахуйтай холбоотой өдөр тутмын амьдралын ёс заншил, зан үйл, хэв маягийг толилуулахаас гадна уламжлалт өвлийн спортын уралдаан, тэмцээн, үзүүлэн тоглолтууд зэрэг олон арга хэмжээнүүдийг өртөөчлөн зохион байгуулах юм. Тухайлбал:

• “Шинэлэх ёс” өргөө;
• “Цагаан сар” өргөө;
• “Түүхэн хөгжим” өргөө;
• “Ёслол, хүндэтгэлийн зоог” уламжлалт идээ ундааны өргөө;
• “Язгуур урлаг”-ийн өргөө;
• “Хувцас, эдлэл хэрэглэл”-ийн өргөө;
• “Тэмээн жин” өртөө;
• “Цаатан” өртөө;
• “Эрдэнэт сүрэг” өртөө;
• “Халх”, “Казах”, “Буриад”  өргөө;
• “Монгол банхар, тайга, анч нохой, Шувуучлахуй” өртөөгөөр зочилж болно. 

Түүнчлэн мөсөн сурын харваа, мөсөн шагайн харваа, морь болон нохой чарга, морин аялал уналга зэрэг зан үйл, спортын үйл ажиллагаануудад биечлэн оролцох боломжтой юм байна. Соёлын бүтээлч үйлдвэрлэлийн бараа бүтээгдэхүүний үзэсгэлэн худалдаа, Монголчуудын уламжлалт идээ ундааны амталгаат худалдаа ч мөн энэ үеэр гарах ажээ.