Японы Хоккайдо мужийн Саппоро хотноо жил бүр зохиогддог Олон улсын цасан баримлын тэмцээнд Монгол Улсын баг хоёр дахь удаагаа түрүүлж, хошой аварга болжээ.
Дөчин ес дэх удаагаа зохиогдож буй тус тэмцээнд Монгол Улс гурав дахь удаагаа оролцсон байна.
Б.Содномдаржаа, А.Батзориг, Б.Ганбаатар нарын бүрэлдэхүүнтэй манай баг "Амьдрал" нэртэй бүтээлээрээ тус тэмцээнд түрүүлжээ. Уран бүтээлчид маань “Хун шувуу хайрын бэлгэдэл болсон нь” үлгэрээс сэдэвлэн бүтээлээ хийсэн бөгөөд хос залуус өөд өөдөөс харан сууж амьдралаа бүтээхээр хичээж буйг дүрсэлсэн байна. Тэд амьдралыг модоор төлөөлүүлсэн бөгөөд хос залуус гар дээрээ амьдралын модоо нандигнан өргөж өөрсдийн биесээр нөмөрлөн хамгаалж угсаа гарвалын шүтээн амьтдаар давхар мануулсныг хуяг хувцаст нь дүрслэн урлажээ.
Хосуудын амьдрал, хайр, эв нэгдэл, үр удмаа тэтгэх жам ёсыг уран сайхнаар дүрсэлсэн баримлын төв хэсэгт хос залуус өөд өөдөөсөө харан, амьдралын модоо гар дээрээ өргөж буйгаар илэрхийлж, тэдний хувцасны хийцэд Монголчуудын шүтдэг шувуу, араатан амьтдын бэлгэдлийг шигтгэсэн байна. Эртний Монгол үлгэрээс сэдэвлэсэн уг бүтээлд дүрсэлсэн хун шувуу үнэнч хайрын бэлгэдэл болдог бол баавгай хүч чадлыг, чоно тэсвэр тэвчээрийг, үнэг заль мэхийг илэрхийлдэг юм. Энэхүү бүтээл нь ертөнцийн амьдралын мөн чанарыг гүн утгаар өгүүлж, Монгол өв соёлын гайхамшгийг цасны уран баримлын хэлээр илэрхийлсэн нь шүүгчдээс өндөр үнэлгээ авсан байна.
Сэтгэгдэл (1)